ჩემი დიდი სურვილი იყო, რომ ამ თანამდებობაზე დავნიშნულიყავი, რადგან კარგად ვიცი ის პრობლემები, რა პრობლემებიც ვეტერანებს აქვთ , – ამის შესახებ დღეს გამართულ პრესკონფერენციაზე ვეტერანთა საქმეების სამსახურის ახლად დანიშნულმა უფროსმა ირაკლი შიხიაშვილმა განაცხადა.
მისი თქმით, მზად არის მიიღოს ეს გამოწვევა და ყველაფერი გააკეთოს, რომ ვეტერანების მდგომარეობა მაქსიმალურად გაუმჯობესდეს.
“მიდიოდა სხვადასხვა საკითხის განხილვა. პრემიერის სურვილი და ჩემი დიდი სურვილი იყო, რომ ამ თანამდებობაზე დავნიშნულიყავი, რადგან ვარ ვეტერანი და კარგად ვიცი რა მდგომარეობაში არიან და რა სირთულეები არსებობს ვეტერანებთან დაკავშირებით. მზად ვარ მივიღო ეს გამოწვევა და ყველაფერი გავაკეთო, რომ მათი მდგომარეობა მაქსიმალურად გაუმჯობესდეს”, – განაცხადა შიხიაშვილმა.
მან არ ისაუბრა, თუ რატომ მოხდა ყოფილი ხელმძღვანელის ცვლილება, თუმცა განაცხადა, რომ ფერაძე ამ სტრუქტურაში აღარ იმუშავებს.
რაც შეეხება შიხიაშვილის სამომავლო გეგმებს, როგორც ის აცხადებს, მისი ერთ-ერთი მთავარი მიზანი იქნება, რომ ვეტერანებმა აღარ იცხოვრონ წარსული ტკივილით და ისინი ქვეყნის აღმშენებლობის საქმეში ჩაერთონ.
“ჩემთვის, როგორც მოქალაქისთვის, როგორც ვეტერანისთვის, ძალიან დიდი პატივია ის ნდობა, რომელიც გამომიცხადა პრემიერმა და მისმა გუნდმა. დიდი ხნის განმავლობაში ვეტერანთა პრობლემები თაროზე იყო შემოდებული და არ იყო ჯეროვანი დამოკიდებულება ამ ადამიანების მიმართ. ძალებს არ დავიშურებთ, რომ გაუმჯობესდეს მათი მდგომარეობა. რაც მთავარია, ჩემთვის, როგორც ხელმძღვანელისთვის, უმნიშვნელოვანესია დამთავრდეს ვეტერანების წარსულის ტკივილით ცხოვრება. მნიშვნელოვანია, რომ დაბრუნდნენ ისინი აწმყოში და აქტიურად მიიღონ მონაწილეობა ქვეყნის აღმშენებლობის პროცესში. ასევე მნიშვნელოვანია, რომ მეტი ყურადღება მიექცეს როგორც ჯანდაცვის, ასევე სხვადასხვა მიმართულებით”, – განაცხადა შიხიაშვილმა.
09.09.14
Discussion about this post