თბილისის მუნიციპალიტეტის საკრებულოში ბრიფინგი გაიმართა, რომელზეც ფრაქციის ,,ერთიანი ნაციონალური მოძრაობა“ წევრმა ირაკლი აბესაძემ თანაგუნდელების სახელით განცხადება გააკეთა.
,,გვინდა გამოვეხმაუროთ თბილისის მერის ბოლოდროინდელ ,,სკანდალურ“ განცხადებებს, რომლითაც აშკარაა დავით ნარმანია ცდილობს გადაფაროს მისი გუნდის წარუმატებელი სტარტი დედაქალაქის მართვაში. დანაშაულებრივი იძულებით სამსახურიდან გაყრილი თანამშრომლები, მხოლოდ პარტიულ-ნათესაური ნიშნით ახალი თანამშრომლების შერჩევა, მშენებლობების შეჩერება, უსაფუძვლო შეტევა ინვესტორებზე, კომერციული ბანკიდან აღებული 30 მილიონი ძვირი სესხი – ეს მცირე ჩამონათვალია თბილისის მთავრობის პირველი ნაბიჯების, ნაცვლად ახალი პროექტების განხორციელების დაწყებისა და ქალაქის განვითარებაზე ზრუნვისა. ამ სრული ჩავარდნის ფონზე დავით ნარმანია ცდილობს საზოგადოებას შეუქმნას ილუზია, თითქოს მისი გუნდი ცდილობს რაღაცის გამოსწორებას და ამაშიც კი ის უხეშ ფაქტობრივ შეცდომებსაც კი უშვებს, რომ არაფერი ვთქვათ სამართლებრივ და თუნდაც სამეურნეო-მმართველობით შეფასებებზე. კერძოდ,
ქალაქში გარე რეკლამის განთავსების ნებართვის აუქციონთან დაკავშირებით იგი აცხადებს, რომ ,,აუქციონის პირობებში მითითებული იყო, რომ ნებართვის საფასურის მინიმალური ოდენობა 1 კვმ–ზე 18 ლარით განისაზღვრა. თუმცა, ნებართვაში, რომელიც კომპანიებზე მერიის სააუქციონო კომისიამ მეორე დღეს გასცა, რეკლამის განთავსებისთვის თანხა 1 კვმ–ზე 6 ლარამდე შემცირდა(?!).“ პასუხი კი ძალიან მარტივია, სააუქციონო პირობებში მითითებული იყო, რომ 1 კვ.მ-ზე კვარტალში (ანუ სამ თვეში) გადასახდელი თანხის ოდენობა იყო 18 ლარი, ხოლო ხელშეკრულებაში მიეთითა, რომ ერთ თვეში გადასახდელი თანხის ოდენობა იყო 1 კვ.მ-ზე 6 ლარი (18 : 3 = 6). შესაბამისად, მცდარია მისი დასკვნა ბიუჯეტისთვის დაკლებულ თანხებზე და ფუჭია მისი მცდელობა ,,იზრუნოს“ ბიუჯეტის შევსებაზე.
დედაქალაქში მიკროავტობუსებით ადგილობრივი სამგზავრო გადაყვანის ნებართვის გაცემის პროცესის კრიტიკისას, ბატონ დავითს, უნდა ახსენდებოდეს, რომ სწორედ იმავე პრინციპით ,,ქართულმა ოცნებამ“ და რუსთავის მერმა, ბატონმა დავით ჯიქიამ, გასცეს ნებართვა ერთ კომპანიაზე რუსთავი-თბილისის მარშრუტზე. ეს ფაქტი ადასტურებს, რომ თბილისის მერიის მიერ ნებართვის გაცემის პროცედურა კანონის დაცვით და რაც მთავარია ეფექტურად წარიმართა.
ზოგადად, გარე რეკლამისა და ქალაქში მიკროავტობუსებით ადგილობრივი სამგზავრო გადაყვანის საკითხთან დაკავშირებით, გვინდა შევახსენოთ ,,ქართული ოცნების“ სამთავრობო გუნდს, რომ ეს სანებართვო საქმიანობაა და ის მკაცრად რეგულირდება ,,ლიცენზიებისა და ნებართვების შესახებ“ საქართველოს კანონით.
ქალაქში პარკირების სფეროს მართვის უფლების გაცემასთან დაკავშირებით, დავით ნარმანია აცხადებს, რომ ,,ტენდერის ჩატარებასთან დაკავშირებით არის ძალიან ბევრი შეკითხვა, რადგან ამ ტენდერში “სითი პარკს” ჰყავდა კონკურენტი, რომელსაც 1 ლარით მოუგო და შემდეგ ამავე კონკურენტთან მოხდა მისი შერწყმა.“ აქაც ბატონ დავითს არასწორ ინფორმაციას აწვდიან მისი მთავრობის წევრები. ჩატარებულ აუქციონში ვაჭრობა მიმდინარეობდა არა ზუსტი თანხის დასახელებით (ლარებში), არამედ სამომავლოდ მიღებული შემოსავლიდან ვინ უფრო მაღალ პროცენტს გადაიხდიდა ბიუჯეტში. შესაბამისად, ტყუილია და თეორიულადაც შეუძლებელი ერთი ლარით მოეგო რომელიმე კომპანიას ეს აუქციონი. სააუქციონო ბიჯი შეადგენდა 2% და იმისათვის რომ რომელიმე კომპანიას მოეგო მხოლოდ ერთი ლარით, უნდა წარმოვიდგინოთ რომ ამ კომპანიის სამომავლო შემოსავალი მთელი პარკირების სფეროდან მხოლოდ 50 ლარი იქნებოდა (1 ლარი წარმოადგენს 50 ლარის 2 %-ს), რაც რა თქმა უნდა აბსურდულია. ასევე არ მომხდარა აუქციონში მონაწილე კონკურენტი სხვადასხვა კომპანიების გაერთიანება.
ასევე, საინტერესოა, რომ პარკირების სფეროს მართვასთან დაკავშირებით, დავით ნარმანია აცხადებს, რომ ,,რაც შეეხება პარკირებას, ქალაქის განსატვირთავად, აუცილებელია მიწისზედა და მიწისქვეშა პარკირების ინფრასტრუქტურის მოწყობა.“ უცნაურია, მაგრამ ალბათ მისთვის უცნობია, რომ მთავრობის 27 აგვისტოს სხდომაზე მან მხარი დაუჭირა თბილისის ბიუჯეტიდან 3 მილიონი ლარის ამოღებას, რომლითაც უნდა ქალაქში უნდა აშენებულიყო ევროპული ტიპის მრავალსართულიანი ავტოსადგომები. ეს მართალაც ძალიან მტკივნეული გადაწყვეტილებაა დედაქალაქისათვის და ჩვენ მოვუწოდებთ თბილისის მთავრობას, საკრებულოში ბიუჯეტის ცვლილების წარმოდგენამდე აღადგინოს აღნიშნული მუხლი და დაუყოვნებლივ დაიწყოს ქალაქში მრავალსართულიანი ავტოსადგომების ინფრასტრუქტურის შექმნა.
ნათელია, რომ დავით ნარმანია და მისი სამთავრობო გუნდი ვერ ახერხებს გაერკვეს მარტივ ფაქტობრივ გარემოებებში მაინც და მათი ნაბიჯები ჯერჯერობით არის აბსოლუტურად წარუმატებელი. გვინდა მოვუწოდოთ, თბილისის მერს თავი დაანებოს დაუსაბუთებელ, უარგუმენტო და უშედეგო ბრძოლას წარსულთან და ბოლოსდაბოლოს შეუდგეს მისი დანაპირების შესრულებას. ჩვენი მხრიდან, მზად ვართ ნებისმიერ დროს ჩვენ მივაწოდოთ ბატონ დავით რეალური და სწორი ინფორმაცია ქალაქის წინაშე არსებულ გამოწვევებზე, რომლებთან გამკლავება წარმოადგენს მის მთავარ მოვალოებას“, – განაცხადა ირაკლი აბესაძემ.
09.09.14
