პრეზიდენტს გაერო-ში ვიზიტთან დაკავშირებით ისევ პრინციპული პოზიცია აქვს, – ამის შესახებ საგარეო საქმეთა მინისტრ მაია ფანჯიკიძესთან ქვეყნის პირველი პირის შეხვედრის შემდეგ ჟურნალისტებს პრეზიდენტის მრჩეველმა საგარეო ურთიერთობების საკითხებში თენგიზ ფხალაძემ განუცხადა.
აქედან გამომდინარე ფხალაძის განმარტებით, პრეზიდენტის ვიზიტზე მუშაობა გრძელდება.
“პრეზიდენტს აქვს ისევ პრინციპული პოზიცია. დანარჩენ ყველა დეტალს მოგახსენებთ მოგვიანებით. ვადასტურებ, რომ პრეზიდენტის ვიზიტზე მუშაობა გრძელდება, თუმცა რა შეხვედრები დაიგეგმება და სხვა დეტალები, გეცოდინებათ მოგვიანებით”, – აღნიშნა ფხალაძემ.
რაც შეეხება შეკითხვას, რამდენად შესაძლებელია, მაია ფანჯიკიძესთან კიდევ გაიმართოს შეხვედრა იმასთან დაკავშირებით, წავა თუ არა პრეზიდენტი გაერო-ში, პრეზიდენტის მრჩევლის განმარტებით, საგარეო საქმეთა სამინისტროსთან იქნება ძალიან ინტენსიური თანამშრომლობა და კომუნიკაცია.
“საქართველოს პრეზიდენტი საგარეო საქმეთა მინისტრთან შეხვედრით უაღრესად კმაყოფილია. განიხილეს, როგორ იქნას გაერო-ზე სახელმწიფო ინსტიტუტები ღირსეულად წარმოდგენილი, თუმცა დეტალებს ამის თაობაზე მოგახსენებთ მოგვიანებით”, – აღნიშნა ფხალაძემ.
საგარეო საქმეთა მინისტრ მაია ფანჯიკიძეს კი, არ დაუკონკრეტებია, დაარწმუნა თუ არა დღვანდელ შეხვედრაზე საქართველოს პრეზიდენტი, რომ არ გაემგზავროს გაერო-ს გენერალურ ასამბლეაზე.
“ვეცდებით, ისეთი გამოსავალი ვიპოვოთ, რომელიც ყველასთვის და, რაც მთავარია, ქვეყნისთვის იქნება მისაღები”, – განაცხადა ფანჯიკიძე.
საქართველოს პრეზიდენტმა, გიორგი მარგველაშვილმა გუშინ განაცხადა, რომ ამერიკაში გაემგზავრება. შესახებ საქართველოს პრეზიდენტმა გიორგი მარგველაშვილმა “რუსთავი 2”-ის გადაცემა “არჩევანში” იმ თემის კომენტირებისას ისაუბრა, რომელიც გაერო-ს გენერალურ ასამბლეაზე და კლიმატის ცვლილებების სამიტზე პრემიერისა და პრეზიდენტის გამგზავრებას უკავშირდება.
მარგველაშვილის თქმით, ამერიკაში მის ვიზიტზე ინტენსიური მუშაობა გრძელდება. “ძალიან მნიშვნელოვანია ყველას შევახსენოთ, რომ საგარეო პოლიტიკურ კურსს, კონსტიტუციის მიხედვით, აყალიბებს პარლამენტი. მეც, მათ შორის, პარლამენტის მიერ მიღებული კურსის ფარგლებში ვმოქმედებ.
ჩვენ ვმუშაობთ ინტენსიურად. რაღაც სირთულეები კომუნიკაციაში არის, ეს ნორმალურია, ახალი კონსტიტუციაა, ხდება მისი მოთელვა, როლების მოთელვა – ეს ნორმალურია, მაგრამ საქართველოს პრეზიდენტი წავა და იქნება ამერიკაში”, – განაცხადა მარგველაშვილმა და აღნიშნა, რომ ის პრემიერ-მინისტრსაც წარმატებულ ვიზიტს უსურვებს გაერო-ში.
ამასთან, საქართველოს მთავრობის წევრები, მმართველი გუნდის წარმომადგენლები და თავად პრემიერი აცხადებენ, რომ გაერო-ს გენერალურ ასამბლეასა და კლიმატის ცვლილებების შესახებ სამიტზე ირაკლი ღარიბაშვილი გაემგზავრება.
10.09.14
