საქართველოს დელეგაცია, პრემიერ-მინისტრ ირაკლი ღარიბაშვილის ხელმძღვანელობით, აზერბაიჯანში იმყოფება. როგორც “თბილისი თაიმსს” პრემიერ-მინისტრის პრესსამსახურიდან აცნობეს , სამთავრობო დელეგაციას ჰეიდარ ალიევის სახელობის ბაქოს საერთაშორისო აეროპორტში აზერბაიჯანის ენერგეტიკის მინისტრი ნატიკ ალიევი და საპატიო ყარაული დახვდა.
პრემიერი დღეს ბაქოში ბუნებრივი აირის სამხრეთის დერეფნის საძირკვლის ჩაყრის ცერემონიაში მიიღებს მონაწილეობას. დაგეგმილია ირაკლი ღარიბაშვილის სიტყვით გამოსვლა.
საქართველოს დელეგაციაში ასევე შედიან – ენერგეტიკის მინისტრი, ვიცე-პრემიერი კახა კალაძე, საგარეო საქმეთა მინისტრის პირველი მოადგილე დავით ზალკალიანი და პარლამენტის წევრი ერეკლე ტრიპოლსკი.
პრემიერ-მინისტრი ჰეიდარ ალიევის ცენტრში გამართულ ფორუმზე სიტყვით გამოვიდა.
“ბუნებრივი აირის სამხრეთ დერეფნის პროექტი მთელი რეგიონის ენერგეტიკულ რუკას შეცვლის და მინდა დაგარწმუნოთ, რომ საქართველო ყველაფერს გააკეთებს აღნიშნული პროექტის წარმატებით განხორციელებისთვის”, – აღნიშნა ღარიბაშვილმა.
მთავრობის მეთაურმა სამხრეთ კავკასიური მილსადენის გაფართოების მნიშვნელობაზე გაამახვილა ყურადღება და აღნიშნა, რომ აზერბაიჯანი საქართველოს ერთ-ერთი უახლოესი მეგობარია.
“ჩვენ უკვე ერთობლივად ვახორციელებთ ისეთ მნიშვნელოვან პროექტებს, როგორიცაა ბაქო-თბილისი-ყარსი და ბაქო-თბილისი-ერზერუმი. ბუნებრივი აირის სამხრეთ დერეფნის პროექტი მთელი რეგიონის ენერგეტიკულ რუკას შეცვლის და ევროპას კასპიის ზღვის რესურსებზე ხელმისაწვდომობას მისცემს. მინდა დაგარწმუნოთ, რომ საქართველო არის სტაბილური პარტნიორი რეგიონში და ჩვენ ყველაფერს გავაკეთებთ აღნიშნული პროექტის წარმატებით განხორციელებისთვის”, – განაცხადა ირაკლი ღარიბაშვილმა სიტყვით გამოსვლისას.
პრემიერ-მინისტრის შეფასებით, ბუნებრივი აირის სამხრეთის დერეფნის განვითარება მნიშვნელოვნად ამაღლებს საქართველოს, როგორც კასპიის რესურსების სატრანზიტო სახელმწიფოს როლს, რაც ქვეყნისთვის დამატებითი შემოსავლის, ენერგეტიკული და პოლიტიკური უსაფრთხოების ზრდის ერთ-ერთი მნიშვნელოვანი ფაქტორია.
რაც შეეხება ბუნებრივი აირის სამხრეთ დერეფნის პროექტს, მისი განხორციელების პერიოდში დაახლოებით 2000 ადამიანი დასაქმდება.
სამხრეთ დერეფნის პროექტი მილსადენის გაფართოების სამუშაოები მოიცავს: პარალელური მილსადენის მშენებლობას: 387 კმ აზერბაიჯანის, 55 კმ საქართველოს ტერიტორიაზე; 2 დამატებით საკომპრესორო სადგურს და ახალი წნევის რეგულირებისა და გამზომი სადგურის ინსტალაციას საქართველოში; იგულისხმება მნიშვნელოვანი პირდაპირი ინვესტიცია, მათ შორის სავარაუდოდ 400 მლნ უშუალოდ საქართველოსთვის შეძენილ საქონელსა და მომსახურებაზე დაიხარჯება; მშენებლობის პიკის პერიოდში დაახლოებით 2000, ხოლო ექსპლუატაციის პერიოდში დაახლოების 125 ახალი მუდმივი სამუშაო ადგილი შეიქმნება საქართველოში; საქართველოს პორტებისა და რკინიგზის გამოყენებით გადაიზიდება დაახლოებით 350 000 ტ სამშენებლო ტვირთი და მასალები; არსებული შეთანხმების თანახმად, საქართველოს შეუძლია ტრანზიტით გატარებული გაზის 5 % შეისყიდოს შეღავათიან ფასად, რაც მილსადენის მაქსიმალური დატვირთვის შემთხვევაში წელიწადში მილიარდ კუბურ მეტრ გაზზე მეტს შეადგენს დამატებით.
საქართველოს ენერგეტიკის სამინისტროს კოორდინაციით შექმნის პროცესშია უწყებათაშორისი ჯგუფი გარემოს დაცვის, ეკონომიკის, იუსტიციის სამინისტროების მონაწილეობით, რომელიც “ბი-პი-ს” საქართველოს წარმომადგენლებთან და საქართველოს ნავთობისა და გაზის კორპორაციასთან ერთად, პერიოდულად მოახდენს პროექტის განხორციელების მონიტორინგის მიზნით სამუშაო შეხვედრებს და წარმოშობილ საკითხებზე დროულ რეაგირებას.
ბუნებრივი აირის სამხრეთის დერეფნის საძირკვლის ჩაყრასთან დაკავშირებით ბაქოში შეკრებილ მაღალი რანგის სტუმრებს მისასალმებელი სიტყვით მიმართა აზერბაიჯანის პრეზიდენტმა ილჰამ ალიევმა.
20.09.14