საქართველოს პარლამენტის დელეგაცია სამუშაო ვიზიტით ამერიკის შეერთებულ შტატებში იმყოფება. როგორც “თბილისი თაიმსს” პარლამენტიდან აცნობეს , 18-19 სექტემბერს ვაშინგტონში კონგრესმენ რობერტ პიტინჯერის ინიციატივით, აშშ-ის კონგრესში სადაზვერვო და უსაფრთოხოების საკითხებზე საპარლამენტთაშორისო ფორუმი გაიმართა. ფორუმში მონაწილეობა მიიღო საქართველოს საპარლამენტო დელეგაციამ, საგარეო ურთიერთობათა კომიტეტის თავმჯდომარის თედო ჯაფარიძის ხელმძღვანელობით. დელეგაციის შემადგენლობაში შედიან: თინათინ ხიდაშელი, ირაკლი სესიაშვილი, დავით დარჩიაშვილი და ირაკლი ჩიქოვანი. საქართველოს საპარლამენტო დელეგაციასთან ერთად ღონისძიებას დაესწრნენ ალბანეთის, ავსტრიის, ბოსნია-ჰერცოგოვინას, ბულგარეთის, ხორვატიის, ჩეხეთის, დანიის, ესტონეთის, ფინეთის, გერმანიის, საბერძნეთის, უნგრეთის, ირლანდიის, იტალიის, ლატვიის, ლუქსემბურგის, მალტის, მონტენეგროს, ნორვეგიის, პოლონეთის, პორტუგალიის, რუმინეთის, სლოვაკეთის, სლოვენიის, შვედეთის და დიდი ბრიტანეთის საპარლამენტო დელეგაციები. პარლამენტის პრესსამსახურის ინფორმაციით, საგარეო ურთიერთობათა კომიტეტის თავმჯდომარის სამუშაო ვიზიტი ვაშინგტონში გრძელდება. ვიზიტის ფარგლებში თედო ჯაფარიძემ შეხვედრა გამართა ორგანიზაციის “ბიზნესის ლიდერები ეროვნული უსაფრთხოებისათვის” (Business Executives for National Security (BENS) ხელმძღვანელთან, გენერალ ნორთი შვარცთან. მხარეებმა განიხილეს საქართველოს პოტენციალი, რათა იგი გახდეს რეგიონული ცენტრი ავღანეთიდან ISAF-ის ძალების რეტროგრადული მოძრაობის პროცესში და სამომავლოდ, სრულად გამოიყენოს ქვეყნის გეოპოლიტიკური და სტრატეგიული ადგილმდებარეობა. თედო ჯაფარიძე ასევე შეხვდა საქართველოს საკითხებზე მომუშავე ანალიტიკოს მაიკლ სესირეს. შეხვედრის თემას საქართველოში მიმდინარე მოვლენები და უკრაინაში განვითარებული სიტუაციის ფონზე აშშ-ის პოლიტიკა წარმოადგენდა. საგარეო ურთიერთობათა კომიტეტის თავჯდომარე ოჰაიოს შტატის რესპუბლიკელ კონგრესმენს მაიკლ ტერნერს და ილინოისის შტატის რესპუბლიკელ კონგრესმენს ჯონ შიმკუსაც შეხვდა. 20.09.14
