საქართველოში ოფიციალური ვიზიტის ფარგლებში, დღეს, საქართველოს თავდაცვის მინისტრმა ირაკლი ალასანიამ ლიტველი კოლეგა იუზას ოლეკასი თავდაცვის უწყებაში მიიღო.
შეხვედრის დასაწყისში, ირაკლი ალასანიამ უელსში გამართულ ნატოს სამიტზე საქართველოსთვის მინიჭებული არსებითი პაკეტის მიმართულებების იმპლემენტაციის პროცესში ლიტვის მხარდაჭერის მნიშვნელობაზე გაამახვილა ყურადღება. საქართველოს თავდაცვის უწყების ხელმძღვანელმა ასევე აღნიშნა, რომ საქართველო ჩრდილოატლანტიკური ალიანსის მხრიდან ერთ-ერთ ყველაზე თავსებად პარტნიორადაა აღიარებული. აქედან გამომდინარე, ნატომ საქართველოს თავდაცვის სფეროში განხორციელებული წარმატებული რეფორმების სხვა ქვეყნებისთვის გაზიარებისკენ მოუწოდა.
ირაკლი ალასანიამ ლიტველ კოლეგას საქართველოს თავდაცვის ტრანსფორმაციის შესახებ მიაწოდა ინფორმაცია. მან ხაზი გაუსვა ნატოს კეთილსინდისიერების ამაღლების პროგრამასთან შეერთებას, შეიარაღებულ ძალებში გატარებულ ინსტიტუციურ რეფორმებს, წოდებრივ ანაზღაურებაზე გადასვლას, ჯარის დეპოლიტიზაციას, სამხედრო მოსამსახურეების სოციალური პირობების გაუმჯობესებასა და ინფრასტრუქტურის განვითარებას.
მხარეებმა თავდაცვის სფეროში ორმხრივი თანამშრომლობის საკითხები განიხილეს და სამომავლო გეგმებზე შეთანმხდნენ. ყურადღება გამახვილდა განათლების მიმართულებით ურთიერთობის გაღრმავებასა და რეზერვის სისტემის დახვეწაზე. საუბარი შეეხო რეგიონალური უსაფრთხოების საკითხებსაც. ირაკლი ალასანიამ კოლეგას ქართული სამხედრო კონტინგენტების ნატოსა და ევროკავშირის ეგიდით ავღანეთსა და ცენტრალური აფრიკის რესპუბლიკაში მიმდინარე საერთაშორისო მისიებში მონაწილეობის შესახებ მიაწოდა ინფორმაცია.
ირაკლი ალასანიამ ლიტველ კოლეგას საქართველოს ევროპულ და ევროატლანტიკურ სტრუქტურებში მხარდაჭერისთვის მადლობა გადაუხადა. მან ხაზი გაუსვა ევროკავშირის მონიტორინგის მისიაში ლიტვიელი დამკვირვებლების მონაწილეობის მნიშვნელობას და ნატოს მატერიალურ-ტექნიკური უზრუნველყოფის სააგენტოს პროექტში „საქართველო IV” ლიტვის მხარის აქტიურ ჩართულობას.
ორი ქვეყნის თავდაცვის მინისტრების შეხვედრას გენერალური შტაბის უფროსის პირველი მოადგილე, ბრიგადის გენერალი ვლადიმერ ჩაჩიბაია, თავდაცვის მინისტრის მოადგილე მიხეილ დარჩიაშვილი, ასევე ლიტვის თავდაცვის უწყების დელეგაციის წევრები და საქართველოს თავდაცვის სამინისტროს სხვა ხელმძღვანელი პირები დაესწრნენ.
შეხვედრის დასრულების შემდეგ საქართველოსა და ლიტვის თავდაცვის მინისტრებმა მედიის წარმომადგენლებისთვის კომენტარები გააკეთეს. “დღეს არის ოფიციალური ვიზიტი, რომლითაც მინისტრმა კიდევ ერთხელ დაადასტურა, თუ რამხელა მნიშვნელობა აქვს ორ ქვეყანას შორის სამხედრო თანამშრომლობის გაღრმავებას. ასევე, ეს არის დასტური იმისა, რომ ნატო და ნატოს წევრი ქვეყნები საქართველოსთან ერთად გეგმავენ კიდევ უფრო გაახშირონ და გააღრმაონ ერთობლივი სამხედრო წვრთნები და ორმხრივი სამხედრო და სამხედრო-ტექნიკური თანამშრომლობა. რა თქმა უნდა, ჩვენ დღეს განვიხილეთ ის ვითარება, რაც რეგიონშია შექმნილი, ის საფრთხეები, რომელიც ორ ქვეყანას აქვს იმ პირდაპირი რუსული აგრესიის შემდეგ, რისი მოწმენიც ყველანი გავხდით უკრაინაში. ასევე, განვიხილეთ კონტრტერორისტული თუ სხვა საფრთხეები, რომელიც ორ ქვეყანას აქვს და დავსახეთ ერთობლივი ურთიერთქმედების გზები. დღევანდელი შეხვედრა და ის დისკუსიები, რომელიც გაიმართება საქართველოს პირველ პირებთან, კიდევ ერთხელ მეტყველბს, თუ რაოდენ დიდი მეგობარი ყავს საქართველოს ლიტვის და ბატონი ოლეკასის სახით. მე ვადასტურებ საქართველოს მხარის სრულ მზადყოფნას, რათა კიდევ უფრო გავაღრმაოთ ორმხრივი სამხედრო თანამშრომლობა” – განაცხადა საქართველოს თავდაცვის მინისტრმა ირაკლი ალასანიამ.
ორმხრივი შეხვედრის შესახებ განცხადება გააკეთა ასევე, ლიტვის თავდაცვის მინისტრმა იუზას ოლეკასმა: „მოხარული ვარ, რომ საქართველოში ვიმყოფები. 2008 წლის შემდეგ საქართველოში ბევრი მნიშვნელოვანი ცვლილება განხორციელდა. ქართველ კოლეგასთან ირაკლი ალასანიასთან ორმხრივ შეხვედრაზე ჩვენ საერთო ინტერესის საკითხები განვიხილეთ, მათ შორის რეგიონალური უსაფრთხოება, საქართველოს ევრო-ატლანტიკურ სტრუქტურებში ინტეგრაცია, თავდაცვის სფეროში გატარებული რეფორმები და საერთაშორისო ოპერაციებში მონაწილეობა. მე კიდევ ერთხელ დავუდასტურე ჩემს კოლეგას, რომ ლიტვა საქართველოს ნატოში ინტეგრაციას უჭერს მხარს, ასევე აგრძელებს საქართველოს მხარდაჭერას სამხედრო წვრთნებისა და განათლების მიმართულებით. საქართველოს თავდაცვის მინისტრთან შეხვედრაზე აღვნიშნე, თუ რამდენად დიდი წვლილი შეაქვს საქართველოს ავღანეთის საერთაშორისო ოპერაციაში. თქვენი ქვეყანა ასევე, აპირებს ჩაერთოს „გადამწყვეტი მხარდაჭერის“ მისიაში, შეუერთდეს ნატოს სწრაფი რეაგირების ძალებსა და „შეკავშრებული ძალების ინიციატივას“. ძალიან ვაფასებ ქართველი სამხედროების ევროკავშირის ეგიდით ცენტრალური აფრიკის რესპუბლიკაში მიმდინარე სამშვიდობო ოპერაციაში მონაწილეობასაც. ჩემს ქართველ კოლეგას მოვუწოდე, რომ თავდაცვის სფეროში რეფორმების გატარება ისევ გააგრძელოს, რათა მიაღწიოს საბოლოო მიზანს – გაწევრიანდეს ნატოში. უელსში გამართულ ნატოს სამიტზე მიღებული გადაწყვეტილებების განხორციელება საქართველოსთვის ძალიან მნიშვნელოვანია. ნატოს წევრი ქვეყნები საქართველოს თავდაცვითი შესაძლებლობების განვითარებას უჭერენ მხარს. მსურს კიდევ ერთხელ გამოვხატო ლიტვის მხარდაჭერა საქართველოს ნატოსა და ევროკავშირში გაწევრიანების მიმართ. მჯერა, რომ საქართველოსა და ლიტვის ორმხრივი ურთიერთობა მომავლაშიც ნაყოფიერი იქნება“.
06.10.14
