წელს “თბილისობა” 25-26 ოქტომბერს გაიმართება. ამის შესახებ თბილისის მერმა დავით ნარმანიამ დღეს გამართულ მთავრობის სხდომაზე განაცხადა. მისი თქმით, “თბილისობის” დღესასწაულთან დაკავშირებით გუშინ გვიან საღამოს დასრულდა სამუშაო ჯგუფის შეხვედრა და შეთანხმდა ძირითადი პროგრამა. “თბილისობის დღესასწაული 25-26 ოქტომბერს, შაბათ-კვირას გაიმართება. წლევანდელი თბილისობა რამდენიმე მნიშვნელოვანი მომენტით იქნება გამორჩეული. იქნება სახალხო დღესასწაული, როგორც წინა წლებში იყო, თუმცა ამასთანავე, ამ ზეიმში წინა პლანზე მოდის ახალგაზრდული ღონისძიებები. ამიტომ, 25 ოქტომბერს იქნება ისეთი ღონისძიებები, სადაც ახალგაზრდობის ინტერესი იქნება უფრო მეტი, თუმცა უნდა აღვნიშნოთ ისიც, რომ ღონისძიებები ყველა ასაკისა და კატეგორიის ადამიანისთვის იქნება”, – განაცხადა თბილისის მერმა. მისივე განცხადებით, თბილისობის დღესასწაულთან დაკავშირებით, უახლოეს დღეებში გამოქვეყნდება პროგრამა. “წლევანდელი ღონისძიება გამორჩეული იქნება. ჩვენ პირველად შემოგვაქვს ნომინაცია “თბილისზე მზრუნველი” და ეს ნომინაცია წლების განმავლობაში გაგრძელდება. ეს იქნება ნომინაცია და ადამიანები დაჯილდოვდებიან სპეციალური ჯილდოებით, რომელთაც განსაკუთრებული წვლილი აქვთ შეტანილი დედაქალაქის განვითარებაში. პარალელურად, ტრადიციული საპატიო თბილისელის დასახელებაც იქნება, რომელზეც მუშაობს შესაბამისი კომისია და ადამიანები მიიღებენ საპატიო თბილისელის წოდებას”, – განაცხადა დავით ნარმანიამ. მისივე განცხადებით, “თბილისზე მზრუნველი” ნომინაცია ეს იქნება განსხვავებული ნომინაცია. “აუცილებელი არ არის მხოლოდ და მხოლოდ ასაკოვანი და ღვაწლმოსილი ადამიანების დაჯილდოება, არამედ დაჯილდოვდებიან ისინი, ვინც მიუხედავად ასაკისა, წვლილი შეიტანეს თბილისის განვითარებაში. წლევანდელ თბილისობაზე ასევე ჩატარდება ღვინის ფესტივალი, იქნება სპეციალური ადგილი, სადაც სომელიეთა ასოციაცია საინტერესო ღონისძიებებს შემოგვთავაზებენ. წლევანდელ “თბილისობაზე” არ იქნება აქტივობები მხოლოდ და მხოლოდ დედაქალაქის ცენტრალურ უბნებში, ღონისძიებები ჩატარდება ქალაქის მასშტაბით, ათივე რაიონში”, – განაცხადა თბილისის მერმა. მისივე განცხადებით, წლევანდელი “თბილისობა” მოსახლეობას დიდხანს დაამახსოვრდება.
08.10.14