დედაქალაქის მერიაში საატესტაციო პროცედურები ღიად და გამჭვირვალედ წარიმართება, – ამის შესახებ თბილისის მერმა დავით ნარმანიამ დედაქალაქის მთავრობის სხდომის დასრულების შემდეგ ჟურნალისტებს განუცხადა.
მისი თქმით, საატესტაციო კომისიის თავმჯდომარედ ვიცე-მერის ალექსანდრე მარგიშვილის კანდიდატურა მისი წარდგენილია.
“მარგიშვილს კარგად ვიცნობ, ვენდობი და ვიცი მისი ობიექტურობა. ის კომისიის თავმჯდომარეა და არა ერთპიროვნული მმართველი, ამიტომ ის ერთპიროვნულ გადაწყვეტილებას ვერ მიიღებს და უხელმძღვანელებს კომისიას, რომელიც გადაწყვეტილებებს უმრავლესობით მიიღებს. პროცესი ძალიან ღიად და გამჭვირვალედ წარიმართება და წინასწარი გულისტკივილი იმასთან დაკავშირებით, რომ უკანონობა მოხდება, საღ აზრს მოკლებულია. თითოეულ ადამიანს ექნება საშუალება დააკვირდეს მოვლენებს, რომელიც ატესტაციასთან და კონკურსთან იქნება დაკავშირებული”, – განაცხადა დავით ნარმანიამ.
მისი თქმით, თანამშრომლების 95%, რომლებიც მერიაში წინა ხელისუფლების დროსაც მუშაობდნენ, ადგილებზე რჩებიან.
“ის, ვინც კეთილსინდისიერად ასრულებს თავის მოვალეობას, აგრძელებენ მუშაობას. ატესტაციის პროცესი, ეს არის გადაუდებელი პროცესი, რადგან ამასთან დაკავშირებით გადაწყვეტილება საქართველოს პარლამენტის და შემდგომ უკვე მთავრობის მიერ იქნა მიღებული. ამიტომ ჩვენ ამ გადაწყვეტილებებს ვემორჩილებით და ამ გადაწყვეტილებებით გასაზღვრული ჩარჩოს და წესების საფუძველზე ღიად, გამჭვირვალედ და ობიექტურად ჩავატარებთ კონკურსთან დაკავშირებულ პროცედურებს”, – განაცხადა ნარმანიამ.
დღეს თბილისის მერიის ფოიეში “ნაციონალური მოძრაობის” წევრები იმყოფებოდნენ. ისინი მერიის მოხელეთა საკონკურსო-საატესტაციო კომისიის თავმჯდომარის პოსტიდან ალექსანდრე მარგიშვილის გადადგომას მოითხოვდნენ.
“ჩვენ პირდაპირ ვაფრთხილებთ მერიის ხელმძღვანელობას, ბატონ ნარმანიას, ვიცე-მერ მარგიშვილს, რომ ის დანაშაულებრივი პროცესი, რომელსაც სათავეში უშაულოდ მარგიშვილი უდგას, თუ არ შეჩერდება და იგი არ იქნება გადაყენებული საატესტაციო კომისიის თავმჯდომარის პოსტიდან, ცოტა ხანში, ეს ყველაფერი მათ ძალიან ძვირ პოლიტიკურ ფასად დაუჯდებათ, ვინაიდან მიმაჩნია, რომ მარგიშვილის დანიშვნა საატესტაციო კომისიის თავმჯდომარის პოსტზე ისეთივე დანაშაულია, როგორც დანაშაულებრივი ზეწოლა თანამშრომლებზე”, – აღნიშნა “ნაციონალური მოძრაობის” წევრმა ნიკა მელიამ.
08.10.14
