საქართველოს რეგიონული განვითარებისა და ინფრასტრუქტურის მინისტრის მოადგილე, თენგიზ შერგელაშვილი გაემგზავრა სტრასბურგში, სადაც მონაწილეობას მიიღებს ევროსაბჭოს რეგიონული და ადგილობრივი თვითმმართველობის კონგრესის 27-ე სესიაში. სესიის ფარგლებში, თენგიზ შერგელაშვილი 2 განხილვაში ჩაერთვება, სიტყვით გამოვა და უპასუხებს კონგრესის წევრების მიერ დასმულ შეკითხვებს.
პირველ მოხსენებას თენგიზ შერგელაშვილი 14 ოქტომბერს, ადგილობრივი თვითმმართველობის პალატაში გამართულ განხილვაზე გააკეთებს და ისაუბრებს საქართველოში თვითმმართველობის რეფორმის ფარგლებში განხორციელებულ ღონისძიებებსა და მიმდინარე პროცესებზე. კონგრესი, ასევე, საქართველოში ადგილობრივი თვითმმართველობის არჩევნების შესახებ მონიტორინგის ჯგუფის ხელმძღვანელის მოხსენებას მოისმენს, რის შემდეგაც დებატები გაიმართება.
მინისტრის მოადგილე 16 ოქტომბრის პლენარულს სხდომასაც დაესწრება და უკრაინასა და მის მეზობელ ქვეყნებში შექმნილი ვითარების შესახებ გააკეთებს განცხადებას.
ევროსაბჭოს რეგიონული და ადგილობრივი თვითმმართველობის კონგრესის 27-ე სესიაში მონაწილეობის მისაღებად, საქართველოდან გაემგზავრა თვითმმართველობების დელეგაციაც, რომელსაც თბილისის მერი, დავით ნარმანია ხელმძღვანელობს. სესიაზე დავით ნარმანია სიტყვით გამოვა და ჩატარებულ ადგილობრივ არჩევნებზე და საქართველოში მიმდინარე თვითმმართველობის რეფორმაზე ისაუბრებს.
13.10.14
