კარგი იქნება თუ უშიშროების საბჭოს საქმიანობას რეგულარული ხასიათი ექნება, – ამის შესახებ საგარეო ურთიერთობათა საპარლამენტო კომიტეტის თავმჯდომარე , თედო ჯაფარიძემ ჟურნალისტებს განუცხადა.
ჯაფარიძე პრეზიდენტ მარგველაშვილის გუშინდელ განცხადებას გამოეხმაურა იმის თაობაზე, რომ რუსეთ-აფხაზეთს შორის გასაფორმებელ, მოკავშირეობის შესახებ ხელშეკრულებასთან დაკავშირებით უშიშროების საბჭოს სხდომის მოწვევას აპირებს და აღნიშნა, რომ უწყებათაშორის დიალოგი ხელს შეუწყობს ქვეყნისთვის სასარგებლო გადაწყვეტილებების მიღებას.
“კარგი იქნება თუ უშიშროების საბჭოს საქმიანობას ექნება რეგულარული ხასიათი. ჩვენ ეს გვჭირდება – უწყებათაშორისი დიალოგი და დისკუსიები აუცილებელია, რათა მივიღოთ ის ოპტიმალური გადაწყვეტილებები, რომელიც წაადგება არა ცალკე პრეზიდენტს, ან პრემიერს, არამედ სახელმწიფოს”, – განაცხადა თედო ჯაფარიძემ.
რაც შეეხება აბაშიძე-კარასინის შეხვედრებს, დეპუტატის აზრით, ზოგადად ფორმატი უნდა შენარჩუნდეს, თუმცა რუსეთის მიერ აფხაზეთთან დაკავშირებით შექმნილი ვითარების გათვალისწინებით, უმჯობესი იქნებოდა დღევანდელ რაუნდში მონაწილეობაზე ქართულ მხარეს უარი ეთქვა.
“ვფიქრობ, შექმნილი ვითარებიდან გამომდინარე უარი უნდა გვეთქვა ამ რაუნდში მონაწილეობაზე. ჩემს მიერ ორი დღის წინ გაკეთებული განცხადება სწორედ ამ რაუნდს შეეხებოდა. ჩვენ დავაფიქსირებდით ჩვენს პოზიციას დიპლომატიური მეთოდისა და ხერხის გამოყენებით. რაც შეეხება ზოგადად ფორმატს, საერთოდ მოლაპარაკება და დიალოგი უნდა დარჩეს. ჩემი პირადი აზრით, ჯობია იყოს დიალოგი, ვიდრე საომარი მოქმედება. უნდა ვისაუბროთ და მოვძებნოთ ოპტიმალური ვარიანტი ვითარების გაუმჯობესებისა და ჩვენი პრობლემების გადაწყვეტისთვის”, – აღნიშნა თედო ჯაფარიძემ.
16.10.14
