სპორტისა და ახალგაზრდობის საქმეთა მინისტრი, ლევან ყიფიანი და შერიგებისა და სამოქალაქო თანასწორობის საკითხებში სახელმწიფო მინისტრი, პაატა ზაქარეიშვილი კვიპროსის რესპუბლიკაში გამართული სასწავლო ვიზიტის მონაწილე ახალგაზრდებს შეხვდებიან.
როგორც “თბილისი თაიმსი” სპორტისა და ახალგაზრდობის საქმეთა სამინისტროდან აცნობეს, შეხვედრაზე ახალგაზრდები ისაუბრებენ ვიზიტის დროს მიღებულ გამოცდილებაზე და თავიანთ შეხედულებებს გაუზიარებენ ლევან ყიფიანსა და პაატა ზაქარეიშვილს.
მათივე ინფორმაციით, საქართველოს სპორტისა და ახალგაზრდობის საქმეთა სამინისტრომ, “საქართველოს ოკუპირებულ ტერიტორიებზე მცხოვრებ ახალგაზრდებთან ურთიერთობის განვითარებისა და იძულებით გადაადგილებული ახალგაზრდების ხელშეწყობის პროგრამის” ფარგლებში, გამოაცხადა კონკურსი “ახალგაზრდული სასწავლო ვიზიტი კვიპროსის რესპუბლიკაში”. კონკურსში მონაწილეობის მიღება შეეძლოთ ახალგაზრდებს, რომლებიც დაინტერესებულნი არიან კონფლიქტების მოგვარებისა და მშვიდობის მშენებლობის საკითხებით.
2014 წლის სექტემბერში ახალგაზრდები ხუთი დღით კვიპროსის რესპუბლიკაში გაემგზავრებიან და ადგილზე გაეცნობიან არსებულ კონფლიქტს, მისი წარმოშობის ისტორიასა და დღევანდელ ვითარებას. ასევე, დისკუსიები გაიმართება საქართველოს ტერიტორიული მთლიანობის საკითხებთან დაკავშირებით. კონკურსის მიზანია, ახალგაზრდები გაეცნონ მშვიდობის მშენებლობისა და კონფლიქტოლოგიის საფუძვლებს, ახალგაზრდების როლს კონფლიქტების მოგვარების პროცესში.
23.10.14
