გაჩნდა კითხვები ქვეყნის საგარეო კურსთან დაკავშირებით და მე არ მაქვს მორალური უფლება, დღეს სხვაგვარად მოვიქცე, – ამის შესახებ საგარეო საქმეთა ყოფილი მინისტრის მოადგილემ დავით ზალკალიანმა საგარეო საქმეთა სამინისტროში გამართულ საგანგებო ბრიფინგზე განაცხადა. მისი თქმით, დღევანდელი არჩევანი შესაბამისობაშია მის სამსახურთან და ღირებულებებთან. მისივე თქმით, მან მიიღო გადაწყვეტილება, რომ გადადგეს დაკავებული თანამდებობიდან და დადგეს მისი მეგობრებისა და თანამებრძოლების გვერდით.
“მე ვიყავი, დღეიდან ისევ ვარ და მომავალშიც ვიქნები “თავისუფალი დემოკრატების” გვერდით. ვიქნები იმ გუნდის გვერდით, რომლისთვისაც მთავარი ფასეულობა არის ადამიანი, ვისთვისაც უმთავრესია ევროპულ ფასეულობებზე დაფუძნებული სახელმწიფოს აშენება, ვისთვისაც უმთავრესია ქვეყნის ევროატლანტიკური არჩევანი. ამ ღირებულებების გარშემო გაერთიანდა ეს გუნდი”, – განაცხადა ზალკალიანმა.
მისივე თქმით, დღეს სხვა რეალობის წინაშე დადგა ქვეყანა.
“გაჩნდა კითხვები ქვეყნის საგარეო კურსთან დაკავშირებით. მე არ მაქვს მორალური უფლება დღეს სხვაგვარად მოვიქცე. არასდროს, ჩემი ქვეყნის პრინციპებისთვის არ მიღალატია. მე ვარ კარიერული დიპლომატი. ჩემი ცხოვრების თითქმის ნახევარი, 22 წელი ვემსახურე ამ სამსახურს და ამ საქმეს მივუძღვენი ყველაფერი. არც ერთ წუთს არ გადამიდგამს გაუაზრებელი ნაბიჯი, არც 2009 წელს, როდესაც გადავდექი ელჩობიდან, როდესაც კვლავ დავბრუნდი დიპლომატიურ სამსახურში დარწმუნებული ვიყავი, რომ აღარასდროს მომიწევდა მსგავსი ნაბიჯის გადადგმა. 2 წელი ვემსახურე ჩემს ქვეყანას ჩემს მეგობრებთან ერთად. მინდა მოვიხსენიო “თავისუფალი დემოკრატები”, რომლებიც 2 წელი ერთგულად ემსახურებოდნენ ჩვენი ქვეყნის ევროპულ არჩევანს. მადლობას გიხდით ყველას, ჩემს კოლეგებს, ქართველ და უცხოელ დიპოლომატებს, ჟურნალისტებს, რომლებთან ერთადაც ვაჯამებდით წინა კვირას და მომდევნო ვიზიტებს. მე არსად არ მივდივარ, მე ისევ აქ ვარ ჩემს თანამებრძოლებთან”, – განაცხადა ზალკალიანმა.
მისივე თქმით, ამაყია, რომ ასოცირების ხელშეკრულების 1000 გვერდზე მისი ხელმოწერა დატოვა.
“ამაყი ვარ, რომ ასოცირების ხელშეკრულების 1000 გვერდზე ჩემი ხელმოწერა დავტოვე. ეს უბრალო ხელმოწერა არ არის, იქ არის ჩემი გული, იქ არის ჩემი რწმენა, რომ საქართველოს ევროატლანტიკური კურსი არის უცვლელი”, – განაცხადა ზალკალიანმა.
05.11.14
Discussion about this post