პარასკევს, 7 ნოემბერს 13:00 საათზე, სასტუმრო თბილისი მერიოტის (შ. რუსთაველის #13) საკონფერენციო დარბაზში (დარბაზი „სანადიმო“) გაიმართება ეკონომიკური ფორუმი თემაზე საქართველოს „სუფთა ექსპორტი“ – სექტორული გამოწვევები.
ფორუმზე, საქართველოში პირველად, მოხდება საქართველოს რეალური ექსპორტის (ექსპორტი რეექსპორტის გარეშე) დარგობრივი ანალიზის ანგარიშის წარმოდგენა. ფორუმის ორგანიზატორია “ახალგაზრდა ანალიტიკოსთა და მეცნიერთა დარბაზი დოქტრინა”.
ორგანიზატორების ინფორმაციით, სრული ექსპორტის ანალიზისას რთულია საქართველოში დამზადებული პროდუქციის საექსპორტო პოტენციალის შეფასება, რადგან მნიშვნელოვან წილს იკავებს ის პროდუქტი ან/და საქონელი, რომელიც რეექსპორტის გზით გადის საქართველოდან, ხოლო „სუფთა ექსპორტის“ დარგობრივი ანალიზი საშუალებას გვაძლევს რეალურად ვნახოთ რომელი სექტორის რა რაოდენობის საქონელი გადის ექსპორტზე ქართული ბაზრიდან.
ფორუმზე განიხილება საქართველოს „სუფთა (რეალური) ექსპორტის“ დარგობრივი დინამიკა 2012, 2013 და 2014 წლის გასული პერიოდისთვის. წარმოდგენილი იქნება დარგობრივი ანალიზი კატეგორიების მიხედვით და გამოიკვეთება, რეალურად რა ოდენობის ქართული პროდუქტი გადის ექსპორტზე.
ფორუმს დაესწრებიან ეკონომიკის ექსპერტები, დარგობრივი ექსპორტიორი კომპანიების წარმომადგენლები და დაინტერესებული მხარეები. ფორუმზე წარმოდგენილი იქნება შესაბამისი რეკომენდაციები და შენიშვნები.
06.11.14
