როცა საქმე ეხება ჩვენი ქვეყნის ტერიტორიულ მთლიანობას, ვიქნებით ძალიან პრინციპულები და კომპრომისს ვერ დავუშვებთ, – ამის შესახებ საქართველოს პრემიერ-მინისტრმა , ირაკლი ღარიბაშვილმა ბრიუსელში, ორდღიანი ვიზიტის შეჯამებისას ჟურნალისტებს განუცხადა.
ირაკლი ღარიბაშვილის განმარტებით, ევროკავშირი მიესალმება საქართველოს მთავრობის თავშეკავებულ პოლიტიკას რუსეთთან მიმართებაში და მოსკოვსა და აფხაზეთს შორის “მოკავშირეობისა და ინტეგრაციის შესახებ” შეთანხმების შესაძლო გაფორმებით შეშფოთებულია.
“მე მათ დეტალურად განვუმარტე ის რისკები, რაც შესაძლოა მოჰყვეს ამ ხელშეკრულების გაფორმებას. კიდევ ერთხელ მოვუყევი, რომ ჩვენ გვაქვს ძალიან კონსტრუქციული მიდგომა ჩვენს მეზობლებთან, მათ შორის რუსეთთან. მათ კიდევ ერთხელ დაადასტურეს მოწონება ჩვენი ახალი პოლიტიკისადმი, რომ ისინი მიესალმებიან ჩვენი მთავრობის თავშეკავებულ პოლიტიკას რუსეთთან მიმართებაში და მოგვიწოდებენ, რომ კონსტრუქციული დიალოგი გავაგრძელოთ. ჩვენ მზად ვართ, ეს დიალოგი გავაგრძელოთ, უბრალოდ, როცა საქმე ეხება ჩვენი ქვეყნის ტერიტორიულ მთლიანობას, ვიქნებით ძალიან პრინციპულები და კომპრომისს ვერ დავუშვებთ”, – განაცხადა ღარიბაშვილმა.
19.11.14
