საგარეო საქმეთა მინისტრმა თამარ ბერუჩაშვილმა სამინისტროს სპიკერის თანამდებობაზე დავით კერესელიძე წარადგინა.
ბერუჩაშვილის თქმით, დავით კერესელიძე საზოგადოებას და მედიას მიაწვდის ინფორმაციას საგარეო საქმეთა სამინისტროს საქმიანობასა და პრიორიტეტებზე. მისივე თქმით, კერესელიძე უწყების სახელით შეაფასებს რეგიონში და მსოფლიოში განვითარებულ მოვლენებს.
“დავით კერესელიძე უფლებამოსილი იქნება გაავრცელოს განცხადებები, რომელიც იქნება სამინისტროს ოფიციალური პოზიცია”, – განაცხადა ბერუჩაშვილმა. თავად კერესელიძემ მინისტრს ნდობისთვის მადლობა გადაუხადა.
“გვინდა, რომ გამოვიდეთ ორშაბათის ტრადიციული ბრიფინგებიდან და საზოგადოებას და მედიას გაცილებით მეტი ინფორმაცია მივაწოდოთ. გვინდა, რომ ეს ინფორმაცია არ იყოს მხოლოდ მშრალი, იქნება უფრო მეტი ანალიტიკა”, – განაცხადა კერსელიძემ.
დავით კერესელიძეს საგარეო საქმეთა სამინისტროში მუშაობის მრავალწლიანი გამოცდილება აქვს. წლების განმავლობაში იგი ხელმძღვანელობდა
საგარეო საქმეთა სამინისტროს საგარეო ეკონომიკურ ურთიერთობათა დეპარტამენტს. ასევე იყო საქართველოს ელჩი ნორვეგიაში, ისლანდიასა და დანიაში, ბოლოს კი იგი საქართველოს წარმოადგენდა შავი ზღვის კვლევის საერთაშორისო ცენტრში ალტერნატიული გენერალური დირექტორის თანამდებობაზე.
01.12.14