აშშ-ის მიერ დაფინანსებული ათასწლეულის გამოწვევის კორპორაციის (MCC) პროგრამის ფარგლებში საქართველოში, ოთხ წლიანი, 16 მილიონიანი, ათასწლეულის გამოწვევის ფონდი – საქართველოს (MCA-Georgia) პროექტი განხორციელდება, რომლის მთავარი მიზანი ქვეყანაში პროფესიული განათლების სექტორის განვითარებაა.
პროფესიული განათლების ხელშეწყობა, ერთ-ერთია იმ სამი მიმართულებიდან, რომელსაც 2013 წლის ივლისში საქართველოს მთავრობასა და აშშ-ის მთავრობის ათასწლეულის გამოწვევის კორპორაციას შორის გაფორმებული 140 მილიონი დოლარის მოცულობის მეორე პროექტი, ანუ როგორც მას ასევე უწოდებენ კომპაქტი, ითვალისწინებს. კომპაქტის ორი დანარჩენი კომპონენტი ზოგადი და უმაღლესი განათლების, კერძოდ კი ტექნიკური და საბუნებისმეტყველო დარგების, ხელშეწყობას მოიცავს.
„პროფესიული განათლება ეკონომიკური განვითარებისათვის“ (ISWD) პროექტი მიზნად ისახავს პროფესიული სასწავლო დაწესებულებების დახმარებას რათა მათ შრომის ბაზრის მოთხოვნების შესაბამისი მაღალკვალიფიციური კადრების მომზადება შეძლონ, მათ შორის გაუმჯობესებული პროგრამების დანერგვის გზით.
ამ პროექტისთვის გათვალისწინებული 16 მილიონი დოლარიდან, დაახლოებით 12 მილიონი საგრანტო პროგრამებისთვის არის გათვალისწინებული ძირითადად პროფესიული საგანმანათლებლო დაწესებულებებისთვის, რათა მათ შეძლონ გააუმჯობესონ სასწავლო პროგრამები საიჟინრო, ტექნოლოგიურ, სოფლის მეურნეობისა და ტურიზმის მიმართულებებში.
კონკურენტუნარიანობის ზრდაზე ორიენტირებული გრანტები ხელმისაწვდომი იქნება საჯარო და კერძო პროფესიული კოლეჯებისთვის და უნივერსიტეტებისთვის, ასევე კომპანიებისთვისა და პროფესიული გადამზადების სექტორში მომუშავე პროფესიული გაერთიანებებისა და არასამთავრობო ორგანიზაციებისთვის.
აღსანიშნავია, რომ ამ მოცულობის საგრანტო მიმართულება პროფესიული განათლების კოლეჯებისთვის საქართველოში პირველად ხორციელდება.
“სოციალური პარტნიორობა და ბიზნესის ჩართულობა, სამწუხაროდ დაბალია და გაძლერებას საჭიროებს. აღნიშნული პროექტის მიზანია გააუმჯობესოს კავშირი ბაზარზე მოთხოვნად უნარებსა და კვალიფიციური კადრების მომზადებას შორის, რაც ბიზნეთან აქტიური კომუნიკაციითა და მათი ჩართულობით არის მიღწევადი,” – განაცხადა ISWD პროექტის კომუნიკაციების სპეციალისტმა ანანო ასათიანმა.
პროექტს მენეჯმენტს და ტექნიკურ მხარდაჭერას გერმანული კომპანია PEM კონსალტინგი უწევს, რომელიც ათასწლეულის გამოწვევის ფონდი – საქართველომ (MCA-Georgia) საერთაშორისო ტენდერის მეშვეობით შეარჩია.
02.12.14
