ფინანსთა სამინისტროს შემოსავლების სამსახურის უფროსი ირაკლი გვარამაძე თანამდებობიდან გათავისუფლდა. ფინანსთა სამინისტროს ინფორმაციით, აღნიშნულ პოსტზე გვარამაძის შემცვლელის კანდიდატურა მინისტრმა ნოდარ ხადურმა მთავრობის თავმჯდომარეს უკვე გადაუგზავნა. უწყების განმარტებით, გვარამაძეს გიორგი თაბუაშვილი შეცვლის. ”მიმდინარე წლის 8 დეკემბერს, ფინანსთა მინისტრმა ნოდარ ხადურმა, ფინანსთა სამინისტროს სსიპ შემოსავლების სამსახურის უფროსის თანამდებობაზე დასამტკიცებლად პრემიერ-მინისტრ ირაკლი ღარიბაშვილს, გიორგი თაბუაშვილის კანდიდატურა წარუდგინა, რომელიც ამავე დროს, კანონმდებლობის დაცვით, კვლავ გააგრძელებს მინისტრის პირველი მოადგილის უფლებამოსილების შესრულებას. გიორგი თაბუაშვილს ფინანსთა მინისტრის პირველი მოადგილის თანამდებობა 2013 წლის იანვრიდან უკავია. მიღებული აქვს ეკონომიკურ მეცნიერებათა მაგისტრის ხარისხი ილინოისის უნივერსიტეტში, აგრეთვე პროექტების მართვის მაგისტრის სერტიფიკატი ჯორჯ ვაშინგტონის უნივერსიტეტში. სხვადასხვა წლებში მუშაობდა როგორც სახელმწიფო, ისე კერძო სექტორსა და საერთაშორისო საფინანსო ორგანიზაციებში. შემოსავლების სამსახურის ახალი ხელმძღვანელი ფინანსთა მინისტრმა სამინისტროს სათათბირო საბჭოს წევრებს დღეს გამართულ სხდომაზე წარუდგინა”, – აცხადებენ სამინისტროში. ფინანსთა სამინისტროს სსიპ შემოსავლების სამსახურის ყოფილი უფროსი ირაკლი გვარამაძე, რომელსაც აღნიშნული პოსტი მიმდინარე წლის თებერვლიდან ეკავა, მუშაობას სამინისტროს ცენტრალურ აპარატში გააგრძელებს. 08.12.14
