დაბადების დღე თითქმის ყველა ასაკის ადამიანისთვის განსაკუთრებული მოვლენაა, ესაა დღე, როდესაც ვხვდებით ჩვენთვის ძვირფას ადამიანებს, ვიღებთ საჩუქრებს, ვაქრობთ სანთლებსა და სურვილს ჩავუთქვამთ. სტატისტიკა გვიჩვენებს, რომ მსოფლიო მოსახლეობის 91 % დაბადების დღეს სიხარულით აღნიშნავს, ამ ადამიანების უმრაველობას, რა თქმა უნდა, პატარები შეადგენენ. მშობლები ცდილობენ, რომ ეს დღე პატარებს დღესასწაულად გადაუქციონ ამისთვის, კი მათ ბავშვთა გასართობი და დაბადების დღის ცენტრები ეხმარებიან. საქართველოში ბოლო წლებია ბავშვთა გასართობი ცენტრები მომრავლდა. მიუხედავად ამისა, დროთაგანმავლობაში მათი უმეტესობა უსახსრობისა და მომხარებლის არ ყოფნის გამო დაიხურა. ეს კი საქართველოში, ამ სეგმენტზე არსებულმა მაღალმა კონკურენციამ გამოიწვია.
ბავშვთა დაბადების დღისა და გასართობი ცენტრი „მეჯიქ სითი“ ამ ბაზარზე უკვე ოთხი წელია არსებობს. გასართობ ცენტრში აცხადებენ, რომ მისი გახსნის დღდან მომხარებლის რაოდენობა იზრდება, რაც განპირობებულია იმ ფაქტორით, რომ „მეჯიქ სითი“ მომხარებლებს სხვა ცენტრებისგან განსხვავებულ გასართობ შოუ – პროგრამებს სთავაზობს. გასართობი ცენტრი ნანა ჯირკელიძემ დაარსა. მისი თქმით, ცენტრის წარმატების მთავარი განმაპირობებელი მიზეზი დიდი შრომა და სწორი სამომავლო გათვლაა. პროფესიით სტომატოლოგი აპირებს, რომ მალე სტომატოლოგიური კლინიკა გახსნას, თუმცა ამბობს, რომ ეს მისთვის ყველაზე საყვარელ საქმეს, ბავშვებთან ურთიერთობას ხელს არ შეუშლის. მეტიც, მომავალში, ბავშვებთან დაკავშირებული სხვა გეგმების განხორციელებაც სურს. „თბილისი თაიმსს“ გასართობი ცენტრის წარმატებული მიშაობის დეტალებზე, სამომავლო გეგმებზე, „მეჯიქ სითის“ დამფუძნებელი, ნანა ჯირკელიძე ესაუბრა.
როგორია თქვენი მოკლე ბიოგრაფია და რამ გადაგაწყვეტინათ ბავშვთა გასართობი ცენტრის დაარსება?
ჩემი მოკლე ბიოგრაფია იწყება იმით, რომ დავიბადე 1973 წელს ქალაქ თბილისში, ვარ დედისერთა, ვიზრდებოდი საკმაოდ მკაცრ ოჯახში, მამა პროფესიით ინჟინერი, დედა კი ექიმი გახლდათ. სკოლის დამთავრების შემდეგ უნდა გადამეწყვიტა თუ, რომელ პროფესიასთან დამეკავშირა ჩემი მომავალი. ისე მოხდა, რომ ჩავაბარე სამედიცინო უნივერსიტეტში და ვსწავლობდი სტომატოლოგიას. შემდეგ დავოჯახდი, მყავს ორი ბიჭი და რვა თვის შვილიშვილი, ნინია. ჩემს ცხოვრებაში ბავშვთა გასართობი ცენტრის დაარსება კონკრეტულ მიზეზთან არ არის დაკავშირებული. უბრალოდ, მიყვარს ძალიან ბავშვები, რაც ბუნებრივია და მსურდა დამეწყო საქმე, რომელიც იქნებოდა ჩემი და რომელსაც გავუძღვებოდი თავად.
როგორ შეიქმნა გასართობი ცენტრი „მეჯიქ სითი“ და რას გრძნობთ მუშაობის პროცესში?
„მეჯიქ სითის“ შექმნის ისტორია 4 წლის წინ დაიწყო, პირველად ცენტრი გაიხსნა ღამბაშიძის ქუჩაზე, იქ ორი წლის განმავლობაში ვიყავით. შემდგომ მოხდა ისე, რომ გადმოვედით თამარაშვილზე და ამჟამად, უკვე აქ გვაქვს ურთიერთობა პატარებთან. ცენტრის გაიხსნა ძალიან სწრაფად და სპონტანურად. პირველივე კვირას დაბადების დღის გადახდის ძალიან ბევრი მსურველი მოვიდა, ეს ყველაფერი ისე მოხდა, რომ არ დამჭირდა რეკლამის ან სხვა გაცნობითი აქტივობების ჩატარება. ბევრი მომხარებელი გვყავდა და საბედნიეროდ, მათი რაოდენობა უფრო და უფრო იზრდება. „მეჯიქ სითიში“ მუშაობა კომფორტულია, ბავშვებთან ურთიერთობა კი ძალიან სასიამოვნო.
თქვენ საქმიან და წარმატებული ქალი ბარძანდებით, რა არის თქვენთვის მუშაობის პროცესში მიუღებელი და ყველაზე მეტად რა სირთულეები შეგხვდათ საქმიანობის პროცესში?
პირველ რიგში, ჩემთვის მიუღებელია ის, რომ „მეჯიქ სითიში“ მომსახურე პერსონალი არ იყოს მომღიმარი, თავაზიანი, მოკრძალებული. ჩემთვის, ხშირად უთქვამთ პატარების დედებს, რომ ჩვენს გასართობ ცენტრში ყველაზე მეტად, რაც ხიბლავთ არის მომსახურება და ის თბილი და სასიამოვნო დამოკიდებულება, რასაც ისინი ჩვენგან იღებენ. მათი აზრი ჩემთვის უზომოდ მნიშვნელოვანია, შეიძლება სხვა დარღვევებზე არ გავამახვილო ყურადღება და თვალი დავხუჭო, მაგრამ მიუღებელია მსგავსი დამოკიდებულება მომხარებელთან. მთავარი სწორედ მომსახურეობაა, ის რასაც ყველაზე მეტად აკვირდება სტუმარი. სირთულეები ყველა საქმიანობას ახლავს, ჩემს შემთხვევაში ეს დაკავშირებულია ყოველდღიურ ურთიერთობაზე განსხვავებულ ადამიანებთან. თითოეულ მათგანს განსაკუთრებული და სხვადასხვა მიდგომა სჭირდება, რაც ხანდახან ნამდვილად რთულია. თუმცა, ასე კონკრეტული სირთულის გამოყოფა გამიჭირდება. ვცდილობ, რომ მაქსიმალურად მშვიდი იყოს ჩემი და ჩემი პერსონალის სამსახური.
როგორია თქვენი ერთი დღე სამსახურში?
ყველა დღეს „მეჯიქ სითიში“ ვატარებ, ერთ ფერხულში ვართ ჩაბმული და ყველაფრის საქმის კურსში ვარ. ვცდილობ, მაქსიმალურად დავამყარო კონტაქტი ყველა სტუმართან. ძირითადად, ჩვენი გასართობი ცენტრის შესახებ ინფორმაციას ჩემი მენეჯერისგან ვიღებ. მას აბარია თითქმის ყველაფერი. ვფიქრობ, რომ არ ვარ მკაცრი და არც არის ამის საჭიროება, ძალიან თავისუფალი და მშვიდი გარემოა ყველასთვის. თან ჩემი აზრით, ის გარემოება, რომ მე მთელ დღეს სამსახურში ვატარებ, ჩემს პერსონალს უფრო მეტად უქმნის იმის პასუხისმგებლობას, რომ იყვნენ უფრო მომღიმარნი და კეთილგანწყობილი. ჩემთვის მთავარია სტუმარი იყოს მაქსიმალურად კმაყოფილი, ჩემი ყოველი დღეც სამსახურში სწორედ ამ მიზანს ემსახურება.
როგორია ამ სეგმენტზე ქართული ბაზარი, რამდენად მომგებიანია იგი და როგორ შეაფასებთ, წლის დასასრულს?
მოგეხსენებათ, რომ დღეს ძალიან ბევრი ბავშვთა გასართობი და დაბადების დღის ცენტრია გახსნილი თბილისში, თითქმის ყოველ ნაბიჯზე, ამდენად რთულია გაუწიო კონკურენცია სხვებს მაგრამ ვთვლი, რომ თუ სწორად გათვლი საკუთარ მიზანს, შესაძლებლობებს, სამომავლო შედეგებს არანაირი პრობლემა არ შეგექმნება. ძალიან სწრაფად გაიხსნა ბევრი ცენტრი და ასევე მალე დაიხურა. ჩვენ უკვე ოთხი წელია ინტენსიურად და შეუსვენებლად ვმუშაობთ. წლის დასასრული ნამდვილად აქტიურია, დღეში 4-5 დაბადების დღეს ვიხდით, ხშირად არის შემთხვევები, რომ ადგილები აღარ გვაქვს და უარს ვეუბნები სტუმრებს.
ადვილად უთავსებთ თუ არა პირად ცხოვრებასა და სამსახურს ერთმანეთს?
ვფიქრობ, რომ პირად ცხოვრებისა და სამსახურის ერთმანეთთან შეთავსება შეუძლებელია თუ გვერდით არ გყავს ისეთი მეუღლე, რომელიც ხელს შეგიწყობს. ჩემი მეუღლე პროფესიით მშენებელია, ის სულ ცდილობს დამეხმაროს, ხშირად ჩემ მაგივარადაც დარჩენილა „მეჯიქ სითიში“ და ჩემი საქმიანობაც შეუთავსებია. ეს ნამდვილად სასიამოვნო და სასიხარულოა.
პროფესია, რომელშიც თქვენს თავს დიდი სიამოვნებით გამოცდიდით?
მიუხედავად იმისა, რომ პროფესიით სტომატოლოგი ვარ, ბავშვობაში ძალიან მინდოდა ვყოფილიყავი იურისტი, ადვოკატობაზე მეტად გამომძიებლობა ან მოსამართლეობა მსურდა. თუმცა ეს ვერ განვახორციელე, შემდგომ როდესაც სამედიცინოზე სწავლა გადავწყვიტე, ისიც კი ვიფიქრე სასამართლო ექსპერტიზა ხომ არ მესწავლა. მაგრამ, საბოლოოდ გავხდი სტომატოლოგი. ჩემი სამომავლო გეგმებიც, „მეჯიქ სითისთან“ ერთად სწორედ ამ პროფესიას უკავშირდება, ვაპირებ რომ გავხსნა სტომატოლოგიური კლინიკა.
როგორია ცენტრის სამომავლო გეგმები? რა იგეგმება მომავალ წელს ახალი?
ჩვენ ძალიან ბევრ სიურპრიზს ვთავაზობთ მომხარებლებს. პირველ რიგში, რაც ნამდვილად ახალია არის ის, რომ მინდა გავხსნა „მეჯიქ სითის“ მეორე ფილიალიც, პირველში სამწუხაროდ ადგილები აღარ გვაქვს და არ მინდა ნამდვილად, რომ სტუმრები ჩვენიდან უკმაყოფილონი წავიდნენ, ამიტომ მეორე ფილიალი განახლებული დარბაზებითა და სხვა სიახლეებით მალე გაახარებს პატარების გულებს.
საერთოდ, რაც ძალიან მინდა და რისი გაკეთების სურვილიც მაქვს ყოველთვის ვცდილობ, მაქსიმალურად დავიხარჯო იმისთვის, რომ გამომივიდეს. ახლაც, ერთი ძალიან კარგი ჩანაფიქრი მაქვს და დარწმუნებული ვარ აუცილებლად მივაღწევ ამ მიზნამდე. „მეჯიქ სითი“ მხოლოდ გასართობი და ბავშვთა დაბადების დღის ცენტრი არ იქნება, ძალიან მალე თბილისში ყველაზე ორიგინალური და ლამაზი საბავშვო სალონი გაიხსნება. სალონის სახელიც „მეჯიქ სითი“ იქნება და საერთოდ, მინდა რომ ბავშვებისთვის ყველაფერი ლამაზი, გასართობი და საინტერესო სწორედ ამ სახელთან ასოცირდებოდეს.
15.12.14
ნათია კეკენაძე
