ენერგეტიკისა და ბუნებრივი რესურსების მინისტრმა, კახა კალაძემ დღეს, სასტუმრო “შერატონ მეტეხი პალასში” “ელექტროენერგიის ტრანსსავაჭრო ვაჭრობის შესახებ” კონფერენცია გახსნა.
კონფერენცია ორდღიანია, რომელსაც ესწრებიან საქართველოში ამერიკის შეერთებული შტატების ელჩის მოვალეობის შემსრულებელი, ბრიჯიტ ბრინკი და ევროკავშირის ელჩი საქართველოში, ფილიპ დიმიტროვი.
კონფერენცია ტარდება უშუალოდ რეგიონალური ენერგეტიკის სექტორის წარმომადგენლებისთვის, რომელიც მიზნად ისახავს რეგიონში ეკოლოგიურად სუფთა ელექტროენერგიით ვაჭრობის ხელშეწყობას როგორც ელექტროენერგიის მყიდველებისა და გამყიდველებისთვის, ასევე ბაზრის სხვა მონაწილეების გამოცდილებისა და მოსაზრებების გაზიარების საშუალებით.
ენერგეტიკის მინისტრმა, კახა კალაძემ ჟურნალისტებს განუცხადა, რომ უახლოეს მომავალში დასრულდება პროექტი, რომელიც ქართულმა მხარემ დაასრულა და ახლა თურქულ მხარეს ელოდება; საუბარია 500 კილოვოლტიან ელექტროგადამცემ ხაზზე, რომლის საშუალებითაც შესაძლებელი იქნება დაახლოებით 1 000-1 200 მეგავატის სიმძლავრის ელექტროენერგიის ქვეყნიდან გატანა.
“ამისთვის მნიშვნელოვანია არსებობდეს რეგულაციები, წესები, როგორც ევროპულ განვითარებულ ქვეყნებში. ამასთან დაკავშირებით USAID-თან მემორანდუმი გავაფორმეთ. USAID ძალიან გვეხმარება ენერგეტიკული პროექტების განხორციელებაში”, – განაცხადა კახა კალაძემ.
15.05.13
