“ევროპარლამენტის მიერ მიღებულ დოკუმენტში კიდევ ერთხელ არის დადასტურებული, რომ საქართველოს “აქვს ევროპული პერსპექტივა”

საქართველოს მთავრობის ადმინისტრაცია ევროპარლამენტის მხრიდან საქართველოს ასოცირების შეთანხმების რატიფიცირებასთან დაკავშირებით განცხადებას ავრცელებს.

განცხადებაშია ნათქვამია, რომ საქართველო ევროკავშირთან ასოცირების ხელშეკრულების რატიფიცირებას მიესალმება.

“ევროპარლამენტმა ხმათა დიდი უმრავლესობით მიიღო უმნიშვნელოვანესი პოლიტიკური და სავაჭრო ხელშეკრულება, რომელიც უკვე ერთმნიშვნელოვნად აყენებს საქართველოს ევროკავშირთან ინტეგრაციის გზაზე. პრემიერ-მინისტრი ირაკლი ღარიბაშვილი მიესალმა ხუთშაბათის კენჭისყრის შედეგს, როგორც ევროპარლამენტის მიერ საქართველოს ევროპული პერსპექტივის მხარდაჭერის მკაფიო დადასტურებას”, – ნათქვამია განცხადებაში.
პრემიერ-მინისტრ ირაკლი ღარიბაშვილის თქმით, დღეს საქართველო არის ევროპული პარტნიორობის წარმატების მაგალითი.

“ყველა ქართველის სახელით, მინდა მადლობა გადავუხადო ევროპარლამენტის წევრებს ჩვენი ქვეყნისა და ჩვენი ინსტიტუტებისადმი ნდობისათვის, რომელიც ამ კენჭისყრის შედეგში გაცხადდა. ბოლო წლებში ჩვენ ძალ-ღონეს არ ვიშურებთ დემოკრატიული რეფორმების გასატარებლად, რომლებმაც განაპირობა კიდეც ჩვენი ეს წარმატება. ასოცირების ხელშეკრულების საშუალებით ჩვენ უზრუნველყოფილი ვიქნებით შესაბამისი სამოქმედო გეგმით, რათა გაგრძელდეს ეს პროცესი და ევროკავშირში საბოლოო გაწევრიანების მიზნისკენ წინსვლას მივაღწიოთ. დღეს საქართველო არის ევროპული პარტნიორობის წარმატების მაგალითი. ჩვენ მტკიცედ გვაქვს გადაწყვეტილი ამ ხელშეკრულების სრულად და სწრაფად განხორციელება, რათა ქვეყანაში სრულად დამკვიდრდეს ევროპული სტანდარტები”, – აცხადებს საქართველოს პრემიერ-მინისტრი ირაკლი ღარიბაშვილი.

მისივე თქმით, ევროპარლამენტის მიერ მიღებულ დოკუმენტში კიდევ ერთხელ არის დადასტურებული, რომ საქართველოს “აქვს ევროპული პერსპექტივა და ის შეძლებს წარდგეს ევროკავშირის წევრობაზე განაცხადით, თუ დაიცავს დემოკრატიის პრინციპებს, პატივისცემით მოეპყრობა ფუნდამენტურ თავისუფლებებსა და ადამიანის უფლებებს, ასევე უზრუნველყოფს კანონის უზენაესობას”.

პრემიერ-მინისტრმა ხაზგასმით აღნიშნა, რომ ევროინტეგრაცია საქართველოს მოქალაქეებს მოუტანს ხელშესახებ შედეგებს, მეორე მხრივ, საქართველო იქნება ევროკავშირის მნიშვნელოვანი პარტნიორი.

“საქართველო არის სტაბილური დემოკრატიის, აქტიური ეკონომიკის ქვეყანა, სათანადო უნარების მქონე და სანდო კონტრიბუტორი საერთაშორისო უსაფრთხოების საქმეში, ასევე ის არის ევროპისკენ მიმავალი ენერგორესურსების საკვანძო სატრანზიტო ქვეყანა”, – განაცხადა პრემიერმა.

ევროპარლამენტმა საქართველო-ევროკავშირის ასოცირების ხელშეკრულების რატიფიკაცია მოახდინა. ღონისძიებას ესწრებოდნენ საქართველოს პრეზიდენტი გიორგი მარგველაშვილი, საგარეო საქმეთა მინისტრი თამარ ბერუჩაშვილი, პარლამენტის ევროპასთან ინტეგრაციის კომიტეტის თავმჯდომარე ვიქტორ დოლიძე, პარლამენტის საგარეო ურთიერთობათა კომიტეტის თავჯდომარე თედო ჯაფარიძე და ევროკავშირში საქართველოს ელჩი ნატალია საბანაძე, აგრეთვე, საქართველოს ყოფილი პრეზიდენტი მიხეილ სააკაშვილი.
საქართველომ ევროკავშირთან ასოცირების შეთანხმებას 2014 წლის 27 ივნისს მოაწერა ხელი.

ამ დრომდე დოკუმენტის რატიფიკაცია 11 ქვეყანამ მოახდინა. ეს ქვეყნებია: ხორვატია, რუმინეთი, ბულგარეთი, ლიტვა, ლატვია, მალტა, სლოვაკეთი, ესტონეთი, უნგრეთი, შვედეთი და დანია.

19.12.14