გაერო-ს უშიშროების საბჭოს სხდომაზე გაკეთებული განცხადებები უაღრესად დროული და მკაფიო იყო, – ამის შესახებ საგარეო საქმეთა მინისტრმა, თამარ ბერუჩაშვილმა ჟურნალისტებს გაერო-ს უშიშროების საბჭოს სხდომაზე რუსეთის მიერ ოკუპირებულ აფხაზეთთან გაფორმებული ხელშეკრულების შესახებ გაკეთებული განცხადებების შეფასებისას განუცხადა.
“ჩვენმა მეგობრებმა ძალიან მნიშვნელოვანი, საქართველოს მხარდამჭერი განცხადებები გააკეთეს. ჩვენმა პარტნიორებმა დაგმეს რუსეთის ქმედებები, რომლებიც პირდაპირ არღვევს საქართველოს ტერიტორიულ მთლიანობას და სუვერენიტეტს, ასევე, ეს არის პრობლემა რეგიონული უსაფრთხოებისთვის და იხმარეს ისეთი მკაცრი სიტყვა, როგორიცაა ანექსიისკენ გადადგმული ნაბიჯი”, – განაცხადა ბერუჩაშვილმა.
მისივე თქმით, რუსეთის მიერ ოკუპირებულ რეგიონებთან გაფორმებული ნებისმიერი შეთანხმება არალეგიტიმურია, თუმცა თვითონ პროცესი სამწუხაროდ, რუსეთის აგრესიული პოლიტიკის გაგრძელებას წარმოადგენს.
ლიტვის, შეერთებული შტატებისა და გაერთიანებული სამეფოს წარმომადგენლებმა გაეროს უშიშროების საბჭოს სხდომაზე ოკუპირებულ აფხაზეთსა და რუსეთს შორის გაფორმებული ე.წ. მოკავშირეობისა და სტრატეგიული პარტნიორობის შესახებ შეთანხმება დაგმეს.
23.12.14
