დღეს, ილიას სახელმწიფო უნივერსიტეტის სტუდენტმა – ირაკლი ბობოხიძემ გამართულ პრესკონფერენციაზე განაცხადა, რომ ილიას სახელმწიფო უნივერსიტეტის სტუდენტის 4500 ხელმოწერა შეგროვდა, რომლებიც ითხოვენ დეკანოზ თეოდორე გიგნაძესთან ყოველთვიური შეხვედრებისთვის აუდიტორიის გამოყოფას.
„ჩვენ გვსურს, რომ მოგაწოდოთ ინფორმაცია იმ საკითხთან დაკავშირებით, რომელიც ილიას სტუდენტებისთვის აქტუალურ და მნიშვნელოვან თემას წარმოადგენს. საქმე ეხება შემდეგ საკითხს, სტუდენტების ინიციატივით და ადმინისტრაციასთან შეთანხმებით, ოქტომბრის თვეში ჩატარდა შემეცნებითი შეხვედრა მამა თეოდორე გიგნაძესთან, რომელსაც ყოველთვიური ხასიათი უნდა მიეღო, თუმცა შემდეგი შეხვედრის ჩატარების მოლოდინში ჩვენთვის ცნობილი გახდა ადმინისტრაციის უარი მამა თეოდორესთვის სივრცის გამოყოფასთან უნივერსიტეტში. რაც დადასტურდა უნივერსიტეტის საზოგადოებასთან ურთიერთობის სამსახურის უფროსის ანა კვანჭილაშვილის ჟურნალ ტაბულაში გამოქვეყნებული განცხადებით, ვციტირებ: „ილიას სახელმწიფო უნივერსიტეტი უარს ამბობს დეკანოზ თეოდორე გიგნაძესთან ლექციების ჩატარებაზე ამ განცხადებას საფუძვლად უდევს ახლახანს 28 ნოემბერს მიღებულ ღონისძიებათა ჩატარების წესი, რომელიც მამა თეოდორესთან მოსალოდნელ მეორე შეხვედრამდე იქნა მიღებული.“
აქედან გამომდინარე, სტუდენტთა საინიციატივო ჯგუფმა დავიწყეთ ხელმოწერების შეგროვება იმ მოთხოვნით, რომ უნივერსიტეტმა მოგვცეს შესაძლებლობა თვეში ერთხელ მოვიწვიოთ ჩვენთვის საინტერესო პიროვნება, მამა თეოდორე გიგნაძე. ხელმოწერების შეგროვების პროცესში ადმინისტრაციის მხრიდან ხელის შეშლის მცდელობის მიუხედავად, ჩვენ გვაქვს 4500 სტუდენტის ხელმოწერა, რომლებიც ითხოვენ დეკანოზ თეოდორე გიგნაძესთან ყოველთვიური შეხვედრებისთვის აუდიტორიის გამოყოფას. ეს ხელმოწერები თან ერთვის მიმართვას უნვიერსიტეტის რექტორის სახელზე, რომელისგანაც ველოდებით ათი სამუშაო დღის ვადაში წერილობით პასუხს აღნიშნულ მოთხოვნასთან დაკავშირებით. ხაზგასმით გვინდა, ვთქვათ რომ აღნიშნული შეხვედრები არ გულისხმობს, რაიმე სახის რელიგიური ან რიტუალური კულტის მსახურებასთან დაკავშირებული ქმედებების განხორციელებას. დასწრება არის თავისუფალი, თავისუფალი პრინციპის თვალსაზრისით,“ – განმარტავს ილიას უნივერსიტეტის სტუდენტი.
24.12.14
ნათია კეკენაძე