ბიძინა ივანიშვილის პარტია “ქართულ ოცნებაში” დაბრუნების საკითხზე არავითარი კონსულტაცია არ გამართულა, – ამის შესახებ პრემიერ-მინისტრმა, ირაკლი ღარიბაშვილმა “ექსპო-ჯორჯიაში” წლის შემაჯამებელ პრესკონფერენციაზე განაცხადა. მისივე განმარტებით, თუ ეს მოხდება, საზოგადოებისთვის საჯარო გახდება. “ადრეც ვთქვი და კიდევ მინდა გავიმეორო, მაშინ როცა ბატონმა ბიძინამ განგვიცხადა, რომ აპირებდა პოლიტიკიდან წასვლას, ყველას ჰქონდა ერთსულოვანი განწყობა და დღესაც ვფიქრობთ, რომ ის არ უნდა წასულიყო, მაგრამ ეს იყო მისი მტკიცედ ჩამოყალიბებული პოზიცია. ბატონი ბიძინა ყველაზე რთულ სფეროში მიდის – სამოქალაქო საზოგადოებას სჭირდება დღეს დახმარება, რომ განვითარდეს, მთავრობა ამყოფოს მუდმივად ფორმაში. ხალხშია უფრო მეტი სამუშაო და მან თქვა, რომ ეს არის ადგილი, სადაც უნდა გადავიდეს და იქედან დაემხარება ხალხს და ქვეყანას. რაც შეეხება პარტიაში დაბრუნებას, ამის თაობაზე არავითარი კონსულტაცია არ გამართულა და თუ ეს მოხდება, არ იქნება დაფარული. ზოგადად, პარტიისთვის ყველას ნაკლები დრო გვაქვს და ვისურვებდი, რომ უფრო მეტი აქტიურობა იყოს, მაგრამ ამას ვგეგმავთ. ჩვენ იანვრიდან ვაპირებთ პარტიული საქმიანობის გააქტიურებას”, – აღნიშნა ღარიბაშვილმა. 26.12.14
