საქართველოს ფინანსთა სამინისტროს ინფორმაციით, 2014 წელს ბიუჯეტის შესრულების ყველაზე მაღალი მაჩვენებელი დაფიქსირდა. საქართველოს ფინანსთა სამინისტროს ინფორმაციით, სახელმწიფო ბიუჯეტის შემოსულობებმა წინასწარი მონაცემებით, 9 120,9 მლნ ლარი შეადგინა, რაც გეგმის – 9 105 მლნ ლარის 100,2%-ია.
სამინისტროს ცნობით, გეგმა გადაჭარბებულია 15,9 მლნ ლარით. მათ შორის: შემოსავლებმა შეადგინა 7 398,7 მლნ ლარი რაც გეგმას – 7,319 მლნ ლარს 79,7 მლნ ლარით აღემატება. შესრულების მაჩვენებელი 101,1 %-ია;
საგადასახადო შემოსავლებმა შეადგინა 6 847.0 მლნ ლარი, რაც გეგმას 27.0 მლნ ლარით აღემატება. შესრულების მაჩვენებელი შეადგენს 100,4 %-ს.
უწყების შეფასებით, აღსანიშნავია, რომ შემოსულობების კუთხით 2014 წლის შესრულება ყველაზე მაღალია ბოლო წლებში. 2009 წელს შემოსულობების გეგმა შესრულდა 98.4%-ით, 2010 წელს – 100.1%, 2011 წელს – 97.7% , 2012 წელს – 98.1%, 2013 წელს – 91.6%-ით.
“სახელმწიფო ბიუჯეტის გადასახდელებმა წინასწარი მონაცემებით შეადგინა 8 973.6 მლნ ლარი, რაც გეგმის 9 080.0 მლნ ლარის 98,8 %-ს შეადგენს. ბოლო 10 წელიწადში ეს მაჩვენებელი უპრეცედენტოა. ამასთან, უნდა აღინიშნოს, რომ ეს მაჩვენებელი მიღწეულ იქნა იმ პირობებში, როცა წლის განმავლობაში ბიუჯეტი არ დაკორექტირებულა. 2009 წელს გადასახდელების გეგმა შესრულდა 97.1%-ით, 2010 წელს – 98.4%, 2011 წელს 98.5%-ით 2012 წელს 96.5%-ით 2013 წელს – 92.6%”, – აცხადებენ ფინანსთა სამინისტროში.
05.01.15
