საპარლამენტო უმრავლესობის ლიდერი დავით საგანელიძე მიიჩნევს, რომ “ნაციონალური მოძრაობის” მიერ გავრცელებული ვიდეოები ამ პოლიტიკური ძალის მიერ დადგმული ერთი დიდი სცენარის ნაწილია. ამის შესახებ ჟურნალისტებს საპარლამენტო უმრავლესობის ლიდერმა “ნაციონალური მოძრაობის” მიერ გუშინ და დღეს გავრცელებული იმ ვიდეოების კომენტირებისას განუცხადა, რომელშიც ასახულია საპატრულო პოლიციისა და მოქალაქეების ურთიერთობა.
“გუშინდელი ჩანაწერი გვიან ვნახე. ამან გარკვეულად დამაფიქრა, შევშფოთდი. ბუნებრივია, ჩემი დასკვნები გავაკეთე რა უნდა მოხდეს და როგორ, მაგრამ დღეს დამატებულმა ახალმა ჩანაწერმა უკვე მაფიქრებინა, რომ “ნაცმოძრაობის” სერიალია. როცა ამას დგამს რომელიმე პოლიტიკური პარტია, მითუმეტეს ისეთი გამოცდილი სერიალების დადგმაში, პიარში, ინტრიგებში და ათას მსგავს ფაქტში, მაფიქრებინებს, რომ ეს მათი დადგმული ერთი დიდი სცენარის ნაწილია და აქ უკვე ყველაფერს უნდა ველოდოთ, რადგან ამ პარტიაში და ამ ძალაში საკმაოდ ბევრი ნიჭიერი “სცენარისტია” იმ გაგებით რა გააკეთოს სიბინძურე და რა ძალებით ებრძოლოს ხელისუფლებას”, – განაცხადა საგანელიძემ.
კითხვაზე, გუშინდელ ჩანაწერში დაფიქსირებული მოქალაქე ეკა ყუშიტაშვილი არის თუ არა მსახიობი, საგანელიძის თქმით, ის შეიძლება მსახიობი არ იყოს, მაგრამ შესაძლოა გამოიწვიო ასეთი მსახიობი, რომ ათქმევინო, გააკეთებინო ყველაფერი და ისეთი რაკურსით წარმოაჩინო, რომ ამას მიეცეს სხვა დატვირთვა.
“ასეთი მსახიობები შეიძლება არ იყვნენ, მაგრამ გაამსახიობო ზოგიერთი და მერე გამოიყენო შენი მიზნებისთვის, ეს მარტივია”, – აღნიშნა საგანელიძემ.
გუშინ და დღეს “ნაციონალური მოძრაობის” წევრებმა ვიდეოები გაავრცელეს, რომელიც საპატრულო პოლიციისა და მოქალაქეების ურთიერთობას ეხება.
28.01.15