კომპანია “იბერკომპანი” რაჭაში მეღვინეობის დარგში ინვესტირებას გეგმავს. ფინანსთა სამინისტროს ინფორმაციით, დღეს ფინანსთა მინისტრი ნოდარ ხადური კომპანია “იბერკომპანის” წარმომადგენლებს შეხვდა, რომლებიც მიმდინარე და მომავალ წელს რაჭაში აღნიშნული რეგიონის უნიკალური მეღვინეობის ტრადიციის აღსადგენად ინვესტიციების ჩადებას გეგმავენ.
სტუმრებმა ფინანსთა მინისტრს გააცნეს გეგმა, რომლის მიხედვითაც, რეგიონში ვაზის უნიკალური ჯიშების გაშენება, ღვინის ქარხნისა და სასტუმროს მშენებლობა, აგრეთვე ღვინის ტურიზმის მიმართულების განვითარება იგეგმება. კომპანიის წარმომადგენელთა განცხადებით, წელს ისინი ასევე გეგმავენ გაფართოვებას ნავთობისა და უძრავი ქონების ბიზნესის კუთხითაც.
როგორც ფინანსთა მინისტრმა აღნიშნა, მსგავსი ტიპის ინვესტირება რეგიონის სოციალურ-ეკონომიკურ განვითარებას, ადგილობრივი მოსახლეობის დასაქმებას შეუწყობს ხელს.
შეხვედრას ასევე მინისტრის პირველი მოადგილე, შემოსავლების სამსახურის უფროსი გიორგი თაბუაშვილი დაესწრო.