როგორც თავდაცვის სამინისტროს გენერალური ინსპექციის უფროსის მოადგილის განცხადებაშია აღნიშნული, ვალერი ზუმბაძე მზადაა, სამართლებრივი პროცედურების ფარგლებში, ყველა კითხვას პასუხი გასცეს.
“ჩემს წინააღმდეგ ბოლო პერიოდში ვრცელდება ყოველგვარ რეალურ საფუძველს მოკლებული ბრალდებები და მიმდინარეობს ცილისმწამებლური კამპანია.
იმისთვის, რათა არ მოხდეს საქართველოს თავდაცვის უწყების იმიჯის შელახვა, მივიღე გადაწყვეტილება დავტოვო დაკავებული თანამდებობა.
მზად ვარ, სამართლებრივი პროცედურების ფარგლებში, პასუხი გავცე ჩემი მისამართით დასმულ ყველა კითხვას.
აქვე მინდა აღვნიშნო, რომ გადავწყვიტე, ცილისმწამებლური განცხადებების ავტორების წინააღმდეგ სარჩელი შევიტანო სასამართლოში, რათა დავიცვა საკუთარი რეპუტაცია და ერთხელ და სამუდამოდ, საზოგადოებისთვის ცნობილი გახდეს სიმართლე“, – აღნიშნულია განცხადებაში.
ცნობისთვის, ყოფილი პოლიტპატიმარი ვახტანგ მაისაია შსს-ს კონტრდაზვერვის ყოფილი თანამშრომლის ვალერი ზუმბაძის თავდაცვითი უწყების მაღალ თანამდებობაზე დანიშვნას კატეგორიულად ეწინააღმდეგება. როგორც სამხედრო ექსპერტმა, ვახტანგ მაისაიამ 6 თებერვალს „პირველ პრესკლუბში“ განაცხადა, ვალერი ზუმბაძე ე.წ. ჯაშუშების და სხვა საქმეების გამყალბებელი და ფალსიფიკატორია.
რამდენიმე დღის წინ ცნობილი გახდა, რომ თავდაცვის სამინისტროს გენერალური ინსპექციის უფროსის მოადგილედ ვალერი ზუმბაძე დაინიშნა. ზუმბაძე ფიგურირებს 2011 წლის 7 ივლისს ფოტოგრაფების დაკავების საქმეში, 2010 წელს ჯაშუშურ ქსელში ჩართული ადამიანების გამოსააშკარავებელ ოპერაცია ”ენვერში” და გავრცელებული ინფორმაციით, ის ასევე ჩართული იყო 2012 წლის ლაფანყურის საქმეშიც. ვალერი ზუმბაძე, ვახტანგ მაისაიას საქმის გამომძიებელიც იყო. პოლიტოლოგი ვახტანგ მაისაია ჯაშუშობის ბრალდებით 2009 წლის მაისში დააკავეს. სასამართლომ მას თავისუფლების 20 წლით აღკვეთა მიუსაჯა. მაისაიას საქართველოს ბოლო მოწვევის პარალამენტმა პოლიტპატიმრის სტატუსი მიანიჭა. ჯაშუშობის ბრალდებით გასამართლებულმა პოლიტოლოგმა სასჯელაღსრულების დაწესებულება პოლიტპატიმრის სტატუსით 2013 წლის 13 სექტემბერს დატოვა.
