“თავისუფალი დემოკრატები” საქართველოს პრემიერ-მინისტრის, ირაკლი ღარიბაშვილის განცხადებას თავდაცვის სამინისტროსთან დაკავშირებით არაკვალიფიციურს უწოდებენ.
როგორც პარტიის მიერ გავრცელებულ განცხადებაშია აღნიშნული, პრემიერ-მინისტრს ჩვევია, რომ საკუთარი უნიათობა და უუნარობა სხვებს გადააბრალოს და პასუხისმგებლობა თავად არაფერზე აიღოს.
“პრმიერის დღეევანდელი განცხადება, კიდევ ერთხელ გვარწმუნებს მის არაკვალიფიციურობაში. მას სჩვევია, რომ საკუთარი უნიათობა და უუნარობა სხვებს გადააბრალოს და პასუხისმგებლობა თავად არაფერზე აიღოს. გვინდა ხაზგასმით აღვნიშნოთ, რომ ზუმბაძეს და გრიგალაშვილს საერთოდ არ უმუშავიათ თავდაცვის სმინისტროში და ეს მხოლოდ პრემიერ – მინისტრის ფავორიტი მინისტრის საკადრო აღმოჩენაა. სწორედ ჯანელიძემ დაასაქმა მაღალ თანამდებობზე გახმაურებული საქმეების პროკურორ-გამომძიებლები. პრემიერმა დღეს კიდევ ერთი განცხადება გააკეთა, რომელიც ადასტურებს, რომ ის მხოლოდ პოლიტიკური ნიშნით აფასებს ადამიანებს. დღეს ირაკლი ღარიბაშვილმა მითითება მისცა თავდაცვის მინისტრს, რომ თანამშრომლები პოლიტიკური ნიშნით დაახარისხოს და ისე გაუშვას სამსახურებიდან.
ის მიდგომები, რომელსაც პრემიერ-მინისტრი უკეთებს დემონსტრირებას, ძირს უთხრის ძალოვან სტრუქტურებს. აქვე ცალსახად უნდა ვთქვათ, რომ პოლიციაში არსებულ ვითარებაზე მთლიანად უნდა აიღოს პასუხისმგებლობა მაშინდელმა შსს მინისტრმა ღარიბაშვილმა. მთავარი რაც საფუძველს ურყევს სამართლდამცავებს არის სწორედ ის, რაც პრემიერისგან დღეს ჩვენ გვესმის.
რაც შეეხება ირაკლი ალსანიას, საზოგადოებას გავახსენებთ, რომ სწორედ ის იყო ერთადერთი მინისტრი, რომელმაც ერთპიროვნული გადაწყვეტილება მიიღო და თანამდებობიდან გაათავისუფლა ის 10 მაღალჩინოსანი, რომლებიც ოჯახის განცხადებით, ჩართულნი იყვნენ სერგო თეთრაძის მკვლელობის საქმეში”, – აღნიშნულია განცხადებაში.
საქართველოს პრემიერ-მინისტრმა ირაკლი ღარიბაშვილმა დღეს მთავრობის სხდომაზე განაცხადა, რომ თავდაცვის სამინისტროში წლების განმავლობაში კეზერაშვილისა და ახალაიას კადრების შენახვა-დაწინაურება ხდებოდა.
როგორც პრემიერმა აღნიშნა, ამ მხრივ ცვლილებები მინდია ჯანელიძემ განახორციელა და სწორედ ამით არის განპირობებული როგორც “ნაციონალური მოძრაობის”, ისე, კოალიცია “ქართული ოცნების” ყოფილი წევრებისგან წამოსული აგრესია.
