„იაგოს ღვინო“ – რას წერენ ქართული ღვინის კომპანიაზე „Forbes“ და „The New York Times“?!

საქართველოსა და ქართული ვაზის ჯიშების ისტორია ერთმანეთთან მყარად არის გადაჯაჭული. საქართველო არის ის ერთადერთი ქვეყანა, რომელშიც ქვევრში ღვინის დაყენების უძველესი ტრადიციები უწყვეტად არის შემონახული. ძველი ვაზის ჯიშების მრავალფეროვნებასთან ერთად, ქართული მევენახეობა-მეღვინეობას შეუძლია ქვევრის ღვინითაც იამაყოს და წარსდგეს მსოფლიოს წინაშე.

მცხეთის რაიონის, სოფელ ჩარდახში იაგო ბიტარიშვილი უკვე ათ წელზე მეტია ღვინოს აწარმოებს. მისი თქმით, ერთ წელიწადში დაახლოებით, წარმოებული ღვინის რაოდენობა 3000 ბოთლს აღწევს. „იაგოს ღვინო“, დღესდღეობით, საქართველოს გარდა მსოფლიოს თერთმეტ ქვეყანაში იყიდება. მას ძირითადად რესტორნებში, ნატურალური ღვინის ბარებსა და სპეციალიზებულ მაღაზიებში შეხვდებით. ღვინის განსხვავებული გემოს საიდუმლოც სწორედ ქვევრში მისი დაყენების ტექნოლოგიაა.

იაგო ბიტარიშვილის ვენახი ბიომეურნეობას წარმოადგენს. მიზეზი კი არის ის, რომ იგი ქიმიურ სასუქებსა და შხამქიმიკატებს არ იყენებს.

“თბილისი თაიმსს“ მსოფლიოში ცნობილი ქართული ღვინის „იაგოს ღვინოს“ კომპანიის დამფუძნებელი იაგო ბიტარიშვილი ესაუბრა.

რას წარმოადგენს ღვინის კომპანია „იაგოს ღვინო“ და როგორია მისი შექმნის ისტორია?

– ღვინის კომპანია „იაგოს ღვინო“ შეიქმნა 2003 წელს და მისი შექმნის ისტორიაც, სწორედ კომპანის დაარსების მიზანს უკავშირდება. ჩვენი მიზანი არის ეკოლოგიურად სუფთა პროდუქტის წარმოება. ეს ეხება, როგორც ვენახში ყურძნის მოყვანას, ისე მარანში ღვინის დაყენების პროცესს. ყველაფერი უნდა იყოს ეკოლოგიურ სტანდარტებთან შესაბამისობაში.

როგორია ამ სეგმენტზე ქართული ბაზარი და რამდენად კომფორტულია თქვენი კომპანიისთვის?

– უნდა ითქვას, რომ ჩვენი კომპანიის „იაგოს ღვინის“ პროდუქციის თითქმის 100 % გადის ექსპორტზე. შესაბამისად, მე გამიჭირდება ადგილობრივი ბაზრის შეფასება, თუმცა ვფიქრობ, რომ ჩემი გადმოსახედიდან ნატურალური ქვევრის ღვინის ბაზრის სეგმენტი საკმაოდ დინამიურად ვითარდება.

„იაგოს ღვინო“-ს საწარმო სად არის ტერიტორიულად და საშუალოდ რამდენ ბოთლს უშვებს წელიწადში კომპანია, როგორია ფასები და რამდენად ხელმისაწვდომია იგი მომხარებლისთვის?

– მცხეთის რაიონის სოფელ ჩარდახში მდეობარეობს ჩვენი მარანი და ვენახი. წარმოება ძალიან ლიმიტირებულია ვინაიდან ჩვენ არ ვყიდულობთ ყურძენს, შესაბამისად მხოლოდ ჩვენი ვენახიდან მიღებული ყურძნისგან ვაყენებთ ღვინოს. ვენახის ფართობი კი სულ 2 ჰექტარია, აქედან გამომდინარე წელიწადში დაახლოებით 3 ათასი ბოთლი ღვინო იწარმოება.

რა უპირატესობები აქვს თქვენს კომპანიას, სხვა კომპანიებთან შედარებით და რამდენი დასახელების ღვინოს უშვებთ?

– მე ვაწარმოებ ერთი დასახელების ღვინოს. ეს არის თეთრი , მშრალი, ჩინური ყურძნისგან დაყენებული ღვინო „ჩარდახი“. ღვინო ყენდება ქართული ტრადიციული წესით, ქვევრებში.

– კონკრეტულად ალბათ, ვერ ვიტყვი სხვა „მამებთან“ შედარებით, რა უპირატესობა აქვს ჩემს ღვინოს. ეს ალბათ ბიზნესში უჩვეულო პასუხად ითვლება, მაგრამ ჩემთვის მთავარია ის, რომ ვაკეთებ იმ საქმეს, რომელიც ძალიან მიყვარს და რაც უფრო მეტად ვიხარჯები, მით უფრო მსიამოვნებს ეს საქმე.

საქართველოს გარდა, სხვა ქვეყნებში თუ იყიდება „იაგოს ღვინო“ და იყო თუ არა პრობლემებთან დაკავშირებული თქვენი ღვინის ექსპორტი, (კონკრეტულად რომელ ქვეყნებში იყიდება)?

– როგორც მოგახსენეთ, ჩვენი პროდუქციის თითქმის 100% გადის ექსპორტზე. პირველად ექსპორტი განხორციელდა 2006 წელს იტალიაში, პრობლემები არ შემქნია არასდროს. შემდეგ იტალიას მოჰყვა ათი ქვეყანა: ინგლისი, საფრანგეთი, აშშ, იაპონია, შვეიცარია, შვედეთი, დანია, სლოვენია, ბელგია და ჰოლანდია. სულ თერთმეტი ქვეყანა.

როგორც ცნობილია, თქვენს ღვინოზე დაიწერა Forbes-ში და The New York Times-ში, როგორ გაიცნო მსოფლიომ თქვენი კომპანიის შესახებ და რას წერდნენ ცნობილი გამოცემები თქვენზე?

– Forbes– ში, იყო ასეთი სტატია „9 სასმელი,რომელიც უნდა გასინჯოთ 2015 წელს“, ამ სიაში მოხვდა ჩემი ღვინოც. რაც შეეხება, The New York Times-ს იქ, 52 ქვეყნის სია იყო გამოქვენებული, რომელშიც აუცილებლად უნდა იმოგზაურონ 2015 წელს. მათ შორის ჩემი მარნის მონახულებასაც ურჩევს სტატიის ავტორი ტურისტებს.

ამ სტატიებში საქართველოდან ასევე მოხვდა რამდენიმე ქართული ღვინო და ადგილი. ასეთი ავტორიტეტული გამოცემების მხრიდან აღიარება დამეთანხმებით, რომ ძალიან დიდი წარმატებაა, მითუმეტეს თუ გავითვალისწინებთ იმას, რომ ასეთ რჩევებს მსგავსი გამოცემები უსაფუძვლოდ არ იცემიან. ეს არის საფუძვლიანი ანალიზის შემდეგ გამოქვენებული სტატიები. მათი ავტორები პროფესიონალები არიან, რომლებიც არაერთხელ არიან ნამყოფი საქართველოში და შესაბამისად, დასკვნებიც ამის მიხედვით გამოიტანეს.

რა შეიგიძლიათ თქვათ კომპანიის სხვა წარმატებების შესახებ და რა იგეგმება მომავალში, რა სიახლეებს უნდა ველოდოთ „იაგოს ღვინისგან“?

– კომპანია ბოლო პერიოდში აქტიურად მუშაობს ღვინის ტურიზმის მიმართულებით, რის განვითარებასაც მომავალშიც აპირებს. ასევე დაგეგმილი გვაქვს სხვადასხვა სიახლე, რომლის შესახებაც, უშუალოდ მათი განხორციელების პროცესში ვისაუბრებ.

რა არის თქვენი ღვინის უპირატესობა? რით შეიძლია განასხვაოს მომხმარებელმა სხვა ღვინოებისგან?

– უნდა ითქვას , რომ უახლოესი ისტორიის მანძილზე ღვინო „ჩარდახი“ იყო პირველი, რომელიც ქვევრში, ტრადიციული მეთოდით, ჭაჭის ექვსთვიანი დაძველებით იქნა დაყენებული. მანამდე მომხარებელი სხვა ტექნოლოგიით დამზადებულ ჩინურ ღვინოს იცნობდა. იმას, რომ ეს საკმაოდ წარმატებული სიახლე იყო ამტკიცებს ისიც, რომ დღეს ანალოგიური მეთოდით უკვე რამდენიმე მარანი აწარმოებს ღვინოს.

ესაუბრა ნათია კეკენაძე