ევროპულ და ევროატლანტიკურ სტრუქტურებში ინტეგრაციის საკითხებში სახელმწიფო მინისტრის დავით ბაქრაძის განცხადებით, საქართველოს ნატო-ში ინტეგრაციის პროცესი მესამე სახელმწიფოს წინააღმდეგ მიმართული არაა. ნატო-საქართველოს ურთიერთობების კომენტირებისას ბაქრაძემ აღნიშნა, რომ სამხრეთ კავკასიაში რაიმე არეულობის მიზეზი საოკუპაციო ჯარი შეიძლება გახდეს. „თუკი საუბარია არეულობაზე, რაიმე დესტაბილიზაციაზე, ამის მიზეზი საოკუპაციო ჯარია, რომელიც საქართველოში დგას. რაც შეეხება საქართველოსა და ნატო-ს ურთიერთობების განვითარებას, ჩვენი ინტეგრაციის პროცესი მესამე სახელმწიფოს წინააღმდეგ მიმართული არაა“, – განაცხადა ბაქრაძემ. ევროპულ და ევროატლანტიკურ სტრუქტურებში ინტეგრაციის საკითხებში სახელმწიფო მინისტრმა განმარტებები რუსეთთან ურთიერთობებში პრემიერ-მინისტრის სპეციალური წარმომადგენლის ზურაბ აბაშიძის განცხადებებზეც გააკეთა და აღნიშნა, რომ არ იცის რა სამხედრო ბაზას და ინფრასტრუქტურის განვითარებას გულისხმობდა აბაშიძე. „ნატო-საქართველოს არსებით ღონისძიებათა პაკეტით განსაზღვრულია შემდგომი ღონისძიებები, რომლებიც გეგმის სრული დაცვით მიმდინარეობს. არ ვიცი რას გულისხმობდა ბატონი ზურაბი, რა სამხედრო ინფრასტრუქტურას, ან ნატო-ს სამხედრო ბაზას, რომელი არ განვითარდება. სამხედრო ბაზაზე საუბარი საერთოდ არაა. არსებობს კონკრეტული ღონისძიებები, რომელიც არსებითი პაკეტითაა განსაზღვრული“, – განაცხადა ბაქრაძემ.