ეროვნული ბანკის პრეზიდენტის გიორგი ქადაგიძის განცხადებით, მას მუდმივი კომუნიკაცია ჰქონდა მთავრობასთან და აქამდე ბრალდებებს ადგილი არ ჰქონია.
ამის შესახებ ქადაგიძემ დღეს გამართულ პრესკონფერენციაზე, იმ კითხვის საპასუხოდ განაცხადა, თუ რას უკავშირებს იგი გუშინ ეროვნული ბანკის წინააღმდეგ მიმართულ ბრალდებებს, მაშინ როდესაც რამდენიმე კვირის წინ საუბარი იყო, რომ ლარი ჯანსაღად იქცევა და ეროვნული ბანკის მიმართ პრეტენზიები არ ისმოდა.
“ვერ გეტყვით, ამ კითხვით უნდა მიმართოთ ამ განცხადებების ადრესატებს. ჩვენი პოზიცია ცნობილი იყო მთავრობისთვის, ჩვენ მუდმივად გვქონდა კომუნიკაცია და აქამდე ასეთი ტიპის ბრალდებებს ადგილი არ ჰქონია”, – განაცხადა გიორგი ქადაგიძემ.
საქართველოს ყოფილმა პრემიერ-მინისტრმა ბიძინა ივანიშვილმა გუშინ ლარის კურსის გაუფასურებაში ეროვნული ბანკის პრეზიდენტი გიორგი ქადაგიძე დაადანაშაულა. ანალოგიური პოზიცია გამოხატეს საპარლამენტო უმრავლესობის წარმომადგენლებმაც.