რუსეთთან ურთიერთობის საკითხებში პრემიერ-მინისტრის სპეციალურმა წარმომადგენელმა ზურაბ აბაშიძემ ეუთო-ს გენერალურ მდივან ლამბერტო ზანიერისთან საქართველო-რუსეთის ურთიერთობები და ჟენევის დისკუსიების მნიშვნელობა განიხილა.
როგორც “თბილისი თაიმსს” მთავრობის ადმინისტრაციიდან აცნობეს, პრემიერის სპეციალურმა წარმომადგენელმა ეუთო-ს გენერალურ მდივანს მიაწოდა ინფორმაცია რუს კოლეგასთან გრიგორი კარასინთან ორმხრივი დიალოგის შესახებ, რომელიც უმთავრესად სავაჭრო-ეკონომიკურ და სატრანსპორტო საკითხებს ეხება.
საუბარი შეეხო აბაშიძე-კარასინის ბოლო შეხვედრას, რომელიც პრაღაში 26 თებერვალს გაიმართა და რომელზეც განხილვის ერთ-ერთი თემა რუსეთ-საქართველოს შორის საბაჟო მონიტორინგის თაობაზე 2011 წელს გაფორმებული ხელშეკრულება იყო. ზურაბ აბაშიძემ შეხვედრისას ასევე ყურადღება გაამახვილა ჟენევის მოლაპარაკებების მნიშვნელობაზე და აღნიშნა, რომ ის აფხაზეთისა და ცხინვალის რეგიონთან დაკავშირებული რთული საკითხების გადასაწყვეტად უმთავრესი ფორმატია.