საქართველოს პრეზიდენტ გიორგი მარგველაშვილის ვიზიტი თურქეთის ქალაქ ყარსში დაიწყო. პრეზიდენტის ადმინისტრაციის ინფორმაციით, გიორგი მარგველაშვილი ყარსში , საქართველოს დელეგაციასთან ერთად თურქეთის პრეზიდენტის მიწვევით იმყოფება.
ქვეყნის პირველი პირი დღეს თურქ და აზერბაიჯანელ კოლეგებთან ერთად “ტრანსანატოლიის ბუნებრივი გაზსადენის” (TANAP) პროექტის საძირკვლის ჩაყრის ცერემონიაში მიიღებს მონაწილეობას.
“ეს არის მნიშვნელოვანი პროექტი. სწორედ TANAP-ის საშუალებით ევროკავშირს აზერბაიჯანიდან საქართველოსა და თურქეთის გავლით დამატებით მიეწოდება ბუნებრივი აირი, რაც ევროკავშირის ენერგოუსაფრთხოების თვალსაზრისით უმნიშვნელოვანესი პროექტია და საქართველოს მონაწილეობა ასეთი ტიპის პროექტში, თავისთავად, საგულისხმოა,”- განაცხადა საქართველოს პრეზიდენტის მრჩეველმა გიორგი აბაშიშვილმა.
დღესვე გიორგი მარგველაშვილი თურქეთის პრეზიდენტთან რეჯეფ თაიფ ერდოღანთან და აზერბაიჯანის პრეზიდენტთან ილჰამ ალიევთან ერთად ჰეიდარ ალიევის სახელობის ლიცეუმის გახსნის ცერემონიას დაესწრება.
ვიზიტის ფარგლებში საქართველოს პრეზიდენტი ქართულ დელეგაციასთან ერთად ყარსის კავკასიის უნივერსიტეტსაც ესტუმრება, სადაც ქართული ენის ფაკულტეტის სტუდენტებს შეხვდება.
ქართული დელეგაციის შემადგენლობაში არიან: საქართველოს ვიცე-პრემიერი, ენერგეტიკის მინისტრი კახი კალაძე, ეროვნული უშიშროების საბჭოს მდივანი ირინე იმერლიშვილი, საქართველოს საგანგებო და სრულუფლებიანი ელჩი თურქეთში ირაკლი კოპლატაძე, საქართველოს პრეზიდენტის ადმინისტრაციის უფროსი დავით პატარაია, საქართველოს პრეზიდენტის ადმინისტრაციის უფროსის მოადგილე, პრეზიდენტის მრჩეველი ეკონომიკურ საკითხებში გიორგი აბაშიშვილი და საქართველოს პრეზიდენტის მრჩეველი – საგარეო ურთიერთობათა მდივანი თენგიზ ფხალაძე.
