თბილისის მერი დავით ნარმანია სამგორის რაიონის გამგებლის პირადი ავტომანქანისთვის ცეცხლის წაკიდების ფაქტზე გამოძიების დასრულებას ელოდება და შეფასებებს მხოლოდ მას შემდეგ გააკეთებს.
როგორც ნარმანიამ თბილისის მთავრობის სხდომაზე განაცხადა, ის დარწმუნებულია, რომ ამ მხრივ სამართალდამცველები საინტერესო შედეგს დადებენ.
“სამგორის რაიონის გამგებლის პირად ავტომანქანას, ღამე ვიღაცამ ცეცხლი წაუკიდა. აღნიშნულ ფაქტზე მიმდინარეობს გამოძიება. მე შეფასებისგან თავს შევიკავებ. დარწმუნებული ვარ, ამაზე გამოძიება საინტერესო შედეგს დადებს, თუმცა თავად ფაქტი ძალიან მძიმე და რთულია”, – განაცხადა ნარმანიამ.
ამ დრომდე დაუდგენელმა პირებმა სამგორის რაიონის გამგებლის მამუკა ჩოქურის პირად ავტომანქანას, “ტოიოტას” მარკის ჯიპს ცეცხლი წაუკიდეს და შემთხვევის ადგილიდან მიიმალნენ. ხანძრის ჩაქრობა გამგებელმა მეზობლების დახმარებით შეძლო. მამუკა ჩოქური მომხდარს მის პოლიტიკურ საქმიანობას უკავშირებს.
