ევროპულ და ევროატლანტიკურ სტრუქტურებში ინტეგრაციის საკითხებში სახელმწიფო მინისტრის პირველი მოადგილე არჩილ ყარაულაშვილი სახალხო დიპლომატიის საკითხებში ნატოს გენერალური მდივნის თანაშემწის მოვალეობის შემსრულებელს ტედ უაითსაიდს შეხვდა.
როგორც “თბილისი თაიმსს” სახელმწიფო მინისტრის აპარატიდან აცნობეს, შეხვედრაზე მხარეებმა განიხილეს საქართველოსა და ნატოს შორის სახალხო დიპლომატიის საკითხებზე თანამშრმლობის პერსპექტივები და ამ მიმართულებით უახლოეს პერიოდში კონკრეტული ნაბიჯების გადადგმის აუცილებლობაზე იმსჯელეს. ხაზი გაესვა უკრაინაში და მთლიანად რეგიონში მიმდინარე მოვლენების ფონზე მზარდი რუსული პროპაგანდის კონტექსტში ნატოს წევრ ქვეყნებთან სტრატეგიული კომუნიკაციის საკითხებზე თანამშრომლობის მნიშვნელობასა და ერთობლივი ძალისხმევის მობილიზებას.
სახელმწიფო მინისტრის პირველმა მოადგილემ მადლობა ნატოს გენერალური მდივნის თანაშემწის მოვალეობის შემსრულებელს საქართველოს ევროატლანტიკური ინტეგრაციის გზაზე ალიანსის აქტიური მხარდაჭერისთვის გადაუხადა. თავის მხრივ, ტედ უაითსაიდმა განსაკუთრებით აღნიშნა ევროატლანტიკური უსაფრთხოების განმტკიცებაში საქართველოს მიერ შეტანილი წვლილი და ნატოს საერთაშორისო სამშვიდობო ოპერაციებში საქართველოს შეიარაღებული ძალების მიერ სამაგალითოდ გაწეული სამსახური. ამასთან, მან დადებითად შეაფასა ევროატლანტიკური ინტეგრაციის კუთხით ჩვენი ქვეყნის მიერ მიღწეული წარმატებები და კიდევ ერთხელ დაადასტურა მხარდაჭერა საქართველოს ნატოში ინტეგრაციის მიმართ.