“ისლამური სახელმწიფო” არის მთელი მსოფლიოს თავის სატკივარი”

პანკისიდან სირიაში გადასული 2-3 ადამიანის გამო სკანდალს ნუ შექმნით, – ასე უპასუხა საქართველოს პრემიერ-მინისტრმა, ირაკლი ღარიბაშვილმა ჟურნალისტებს პანკისის ხეობიდან სირიაში ორი მოსწავლის გადასვლის საკითხთან დაკავშირებით დასმულ კითხვაზე. მთავრობის მეთაურმა მედიას შეახსენა, რომ აღნიშნული პრობლემა მთელ მსოფლიოს აწუხებს და “საქართველო გამონაკლისი ვერ იქნება”. “რაც შეეხება ახალგაზრდების გადინებას სირიაში – მე შეგახსენებთ, რომ პანკისის 100-ზე მეტი მკვიდრი ხელისუფლებაში ჩვენს მოსვლამდე გავიდა სირიაში, ჩვენი მთავრობის პირობებში კი სულ რამდენიმე ახალგაზრდა გადაადგილდა თურქეთის მიმართულებით, საიდანაც ალბათ გადავიდნენ სირიაში – 2, 3 ან 4, 5 ადამიანი შეიძლება იყოს. თქვენ საზოგადოება შეგყავთ შეცდომაში, როდესაც სვამთ კითხვას, რატომ არ მოხდა ამის პრევენცია. “ისლამური სახელმწიფო” არის მთელი მსოფლიოს თავის სატკივარი – მსოფლიო ლიდერები ვერ პოულობენ გამოსავალს, თუ როგორ უნდა აღკვეთონ მოხალისეების წასვლა სირიაში. ამ დროს, თქვენ მეკითხებით, ორმა-სამმა ადამიანმა როგორ მოახერხა და როგორ დავუშვით, როგორ ვერ მოახდინა მთავრობამ ამის პრევენცია. რა თქმა უნდა, ძალიან სამწუხაროა და აბსოლუტურად მიუღებელია ჩემთვის რაც მოხდა. მინდა, მათი ოჯახის წევრებს ვუთხრა, რომ ძალიან განვიცდით ამ საკითხს, მაგრამ, მეორე მხრივ, ეს არის პრობლემა, რომელიც მთელ მსოფლიოს აწუხებს და საქართველო არ არის გამონაკლისი. ჩვენ ვართ გამონაკლისი იმ კუთხით, რომ მხოლოდ რამდენიმე ადამიანია წასული”, – განუცხადა ირაკლი ღარიბაშვილმა ჟურნალისტებს. რაც შეეხება მედიის ზოგიერთი წარმომადგენლის მხრიდან გამოთქმულ მოსაზრებას, რომ პანკისელ მოსწავლეებს სირიაში გადასვლაში შესაძლოა შინაგან საქმეთა სამინისტროს ადგილობრივი თანამშრომლები დახმარებოდნენ, პრემიერმა აღნიშნული კატეგორიულად გამორიცხა. “ეს არის დაუსაბუთებელი ეჭვი, ეს არის ბრალდება და ჩვენი მთავრობის დადანაშუალება, რაც არის აბსურდი – ამას სრული პასუხისმგებლობით გიდასტურებთ. როგორ წარმოგიდგენიათ, რომ ჩვენ რომელიმე არაკანონიერი მოქმედება წავახალისოთ?.. მე გუშინ, “რუსთავი 2″-ზე ვიყურე რაღაც შოუს. ყველას მოგიწოდებთ – ეროვნული უსაფრთხოების საკითხებზე ამგვარი მასკარადების დადგმა და ასეთი უპასუხისმგებლო შოუების მოწყობა არის ყოვლად ანტისახელმწიფოებრივი. მინდა, ეს ყველამ გაითვალსიწინოს, ვინც ამას გეგმავს. ეს არის საკითხი, რომელიც დღეს მთელ მსოფლიოს აწუხებს და ამის ერთი ხელის მოსმით გადაჭრა შეუძლებელია, ამიტომ ნუ შეგყავთ საზოგადოება შეცდომაში”, – მიმართა პრემიერმა ჟურნალისტებს. ამასთან, ირაკლი ღარიბაშვილის თქმით, პანკისში კონკრეტული ჯგუფები არსებობენ, რომლებიც სიტუაციას რევს. “უხუცესებთან მე მაქვს კარგი ურთიერთობა, რამდენიმეჯერ შევხდი მათ. რამდენიმე ადამიანისგან დაკომპლექტებული კონკრეტული ჯგუფების შესახებ კი, რომელიც სიტუაციას რევს პანკისში, შესაბამისმა სამსახურებმა ძალიან კარგად იციან და ისინი გაანეიტრალებენ ამ ჯგუფებს კანონის შესაბამისად. 2-3 ადამიანის გამო სკანდალს ნუ შექმნით”, – აღნიშნა მთავრობის მეთაურმა.