ბელორუსიის პრეზიდენტი ალექსანდრე ლუკაშენკო 23 აპრილს საქართველოს პრეზიდენტს გიორგი მარგველაშვილს და პრემიერ-მინისტრს ირაკლი ღარიბაშვილს შეხვდება.
გიორგი მარგველაშვილთან შეხვედრის შემდეგ, ხელი მოეწერება ერთობლივ დოკუმენტს და 2 ქვეყნის პრეზიდენტების ერთობლივი პრესკონფერენცია გაიმართება.
ასევე, 23 აპრილს ბელორუსიის პრეზიდენტი ყვავილებით შეამკობს საქართველოს ერთიანობისთვის დაღუპულ გმირთა მემორიალს და უცნობი ჯარისკაცის საფლავს.
ალექსანდრე კულაშენკო ოფიციალური ვიზიტის ფარგლებში ასევე შეხვდება სრულიად საქართველოს კათალიკოს-პატრიარქს ილია მეორეს და სამების საკათედრო ტაძარს დაათვალიერებს.
რაც შეეხება 24 აპრილს დაგეგმილ ღონისძიებებს, ალექსანდრე ლუკაშენკო ეწვევა ბათუმს, სადაც აჭარის ავტონომიური რესპუბლიკის თავმჯდომარეს არჩილ ხაბაძეს შეხვდება.
ასევე ბათუმში ხელი მოეწერება ქალაქ ბათუმისა და ქალაქ ბრესტის დაძმობილების ხელშეკრულებას.
ამასთან, ბელორუსის რესპუბლიკის პრეზიდენტის ვიზიტის ფარგლებში, 22 აპრილს საქართველო-ბელორუსის ბიზნესფორუმი გაიმართება.
ბიზნესფომრუმზე ბელორუსის დელეგაციას რესპუბლიკის ვიცე-პრემიერი მიხეილ რუსი უხელმძღვანელებს. ასევე, დაგეგმილია ბელორუსიის სასურსათო პროდუქციის დეგუსტაციის მოწყობა, რომელშიც 15-მდე ბელორუსული კომპანია მიიღებს მონაწილეობას.
ასევე, 23 აპრილს, ღონისძიების ფარგლებში, იგეგმება „საქართველოს სავაჭრო-სამრეწველო პალატას“ და ბელორუსის რესპუბლიკის სავაჭრო-სამრეწველო პალატას შორის თანამშრომლობის შესახებ შეთანხმების ხელმოწერა.