ბელორუსის მხარდაჭერა საქართველოს ტერიტორიული მთლიანობის, სუვერენიტეტისა და არაღიარების პოლიტიკის მიმართულებით ძალიან მნიშვნელოვანია , – ამის შესახებ პრეზიდენტის მრჩეველმა საგარეო ურთიერთობათა საკითხებში თენგიზ ფხალაძემ დღეს გამართულ პრესკონფერენციაზე განაცხადა.
ფხალაძემ ისაუბრა ალექსანდრე ლუკაშენკოს საქართველოში დაგეგმილი ვიზიტის მნიშვნელობაზე და აღნიშნა, რომ ბელორუსის პრეზიდენტი საქართველოში გიორგი მარგველაშვილმა ჯერ კიდევ ერთი წლის წინ უკრაინის პრეზიდენტ პეტრო პოროშენკოს ინაუგურაციაზე შეხვედრისას მოიწვია.
“ამ ვიზიტს მართლაც განსაკუთრებული დატვირთვა აქვს ორ ქვეყანას შორის ურთიერთობებში. ჯერ ერთი, ეს არის პირველი სახელმწიფო ვიზიტი, ამ დონის ოფიციალური სტუმარი ბელორუსიდან არ გვყოლია. აქედან გამომდინარე, უაღრესად მნიშვნელოვანია ამ ვიზიტის განხორციელება. ვიზიტისთვის მზადება დაახლოებით ერთი წლის განმავლობაში ინტენსიურად მიმდინარეობდა. იყო სხვადასხვა დონეზე უწყებათაშორისო კონსულტაციები, ეკონომიკური კომისიის რამდენიმე სხდომა და საბოლოო ჯამში, ეს ყველაფერი სრულდება იმით, რომ შედგება სახელმწიფო ვიზიტი. თუ შეხედავთ დელეგაციის რაოდენობას, ხარისხობრივ წარმომადგენლობას, საკმაოდ მაღალი დონის და მრავალრიცხოვანი დელეგაცია ჩამოდის, რაც კიდევ ერთხელ მიუთითებს საქართველოს მიმართ დიდ ინტერესზე და ასევე იმ დიდ რესურსზე, რომელიც ორმხრივ ურთიერთობებში არსებობს და რომელიც უნდა იქნას გამოყენებული. პოლიტიკური თემებიდან, უპირველეს ყოვლისა, ხაზს გავუსვამდი იმ თემის მნიშვნელობას, რასაც ჰქვია საქართველოს ტერიტორიული მთლიანობა, სუვერენიტეტი და არაღიარების პოლიტიკა. რაც შეეხება ეკონომიკურ, სავაჭრო, ტურიზმის მიმართულებებს, ამ სფეროებში არაერთი შეთანხმება იქნება გაფორმებული”, – განაცხადა თენგიზ ფხალაძემ და დასძინა, რომ საბოლოო ჯამში, ეს ვიზიტი ხელს შეუწყობს ორი ქვეყნის შორის ურთიერთობების განვითარებას.
კითხვაზე, ხომ არ ქმნის უხერხულობას ბელორუსის პრეზიდენტის საქართველოში ვიზიტი, მაშინ როდესაც ბელორუსის მიმართ დასავლელი პარტნიორების მხრიდან ადამიანის უფლებების დარღვევასთან დაკავშირებით არაერთი შენიშვნა არსებობს, თენგიზ ფხალაძე აცხადებს, რომ მას არ ესმის რატომ უნდა შექმნას ამან უხერხულობა.
“დამოკიდებულება ამა თუ იმ სახელმწიფოს მიმართ ყველა ქვეყანას თავისი აქვს. ეს შენიშვნები თუ მოსაზრებები, რაც არა ერთხელ გამოთქმულა ბელორუსის როგორც სახელმწიფოს მიმართ, არ არის უცხო და საზოგადოებისთვის ცნობილია, თუმცა თანამედროვე მსოფლიოში, მითუმეტეს ისეთი პატარა ქვეყნისთვის, როგორიც საქართველოა, უმნიშვნელოვანესია კეთილმეგობრული ურთიერთობები არსებობდეს ყველა იმ სახელმწიფოსთან, რომელთანაც შეიძლება რომ ასეთი ურთიერთობები არსებობდეს. ბელორუს და ქართველ ხალხს ბევრი რამ აკავშირებთ ერთმანეთთან და ეს რესურსი უნდა იქნას გამოყენებული”, – განაცხადა თენგიზ ფხალაძემ.
ალექსანდრე ლუკაშენკო საქართველოს 22 აპრილს ორდღიანი ვიზიტით ეწვევა.
