საგარეო საქმეთა სამინისტროში საქართველოს სტრატეგიული პარტნიორობის ქარტიის ფარგლებში უსაფრთხოებისა და თავდაცვის სამუშაო ჯგუფის შეხვედრა გაიმართა.
შეხვედრას ქართული მხრიდან ხელმძღვანელობდა საგარეო საქმეთა მინისტრის პირველი მოადგილე დავით დონდუა და თავდაცვის მინისტრის მოადგილე, ლევან ღირსიაშვილი, ხოლო ამერიკის შეერთებული შტატების მხრიდან აშშ-ის სახელმწიფო მდივნის მოადგილე ტოდ ჩეპმენი და ამერიკის შეერთებული შტატების თავდაცვის მდივნის მეორე მოადგილე რუსეთის, უკრაინისა და ევრაზიის საკითხებში ეველინ ფარკასი.
როგორც შეხვედრის დასრულების შემდეგ საგარეო საქმეთა მინისტრის პირველმა მოადგილემ, დავით დონდუამ განაცხადა, შეხვედრაზე ამერიკულმა მხარემ კიდევ ერთხელ გამოხატა ურყევი მხარდაჭერა საქართველოს სუვერენიტეტისა და ტერიტორიული მთლიანობის მიმართ საერთაშორისოდ აღიარებულ საზღვრებში.
“ამერიკულმა მხარემ აგრეთვე დაგმო რუსეთის მიერ საქართველოს ტერიტორიების ოკუპაცია და რუსეთის აგრესიული ქმედებები. ამერიკის შეერთებული შტატების წარმომადგენლებმა ასევე ხაზი გაუსვეს მტკიცე მხარდაჭერას საქართველოს ევროკავშირსა და ნატოში ინტეგრაციის კუთხით”, – განაცხადა დონდუამ.
მისივე თქმით, შეხვედრაზე ასევე განიხილეს საქართველოს ოკუპირებულ ტერიტორიებზე შექმნილი ვითარება, ქვეყნის წინაშე არსებული უსაფრთხოების გამოწვევები და მასთან გამკლავების გზები. ასევე დეტალურად განიხილეს საქართველოს ნატოში ინტეგრაციის საკითხი და ნატო-საქართველოს არსებითი პაკეტით გათვალისწინებული ღონისძიებების შესრულებაში აშშ-ს მხარდაჭერა.
“ამერიკის შეერთებულმა შტატებმა მადლიერება გამოხატა საქართველოს მიერ სამშვიდობი მისიებში შეტანილი წვლილისთვის. განსაკუთრებული ყურადღება დაეთმო ორმხრივ თანამშრომლობას უსაფრთხოებისა და თავდაცვის სფეროებში. აშშ დადებითად აფასებს საქართველოს მიერ მიღწეულ პროგრესს თავდაცვისა და უსაფრთხოების სისტემების რეფორმირების პროცესში და ადასტურებს მზაობას გააგრძელოს და გააღრმავოს საქართველოსთან თანამშრომლობა. მათ შორის ჩვენი ქვეყნის თავდაცვითი შესაძლებლობების განვითარების კუთხით”, – განაცხადა დავით დონდუამ.
