ბათუმი და ბელარუსის ქალაქი ბრესტი დამეგობრდნენ. დამეგობრების მემორანდუმს ბათუმის მერმა გიორგი ერმაკოვმა და ბრესტის მერმა ალექსანდრ როგაჩუკმა მოაწერეს ხელი.
ღონისძიება ბათუმში, სასტუმრო “შერატონში” გაიმართა. ქალაქების დამეგობრების ცერემონიალს საქართველოს პრეზიდენტი გიორგი მარგველაშვილი, ბელარუსის პრეზიდენტი ალექსანდრე ლუკაშენკო, ბელარუსის დელეგაცია, აჭარის მთავრობის თავმჯდომარე არჩილ ხაბაძე და აჭარის მთავრობის წევრები დაესწრნენ.
როგორც ბათუმის მერმა გიორგი ერმაკოვმა განაცხადა, ბრესტთან დამეგობრების თაობაზე მოლაპარაკებებში ჩართული იყო საქართველოს საგარეო საქმეთა სამინისტრო. ბათუმის მერის განმარტებით, საქართველოსა და ბელარუსის პრეზიდენტების თანდასწრებით ქალაქებს შორის დამეგობრების მემორანდუმის გაფორმებამ უფრო მეტი მნიშვნელობა შეიძინა.
“საგარეო საქმეთა სამინისტროს დახმარებით წინასწარი მოლაპარაკებები გვქონდა ბელარუსის ქალაქ ბრესტთან. საპრეზიდენტო ვიზიტის ფარგლებში განხორციელდა ამ ხელშეკრულების გაფორმება, რაც უფრო მეტ მნიშვნელობას სძენს ამ მოვლენას. ჩვენ ვისაუბრეთ იმ ურთიერთობაზე, რომელიც შეიძლება ჩამოყალიბდეს ბათუმსა და ბრესტს შორის. ეს ძირითადად არის ტურიზმის მიმართულება, რათა ბათუმი გავხადოთ უფრო მიმზიდველი ტურისტებისთვის და მოხდეს ქალაქის პოპულარიზაცია”, – აღნიშნა გიორგი ერმაკოვმა.
მისივე განმარტებით, ბელარუსის დელეგაცია ბათუმში პირველად იმყოფებოდა და ისინი გაეცნენ ბათუმის პოტენციალს. მერის განმარტებით, შეხვედრების დროს დაიგეგმა ქალაქებს შორის თანამშრომლობა ტურიზმისა და კულტურული ღონისძიებების მიმართულებით.
