2013 წლის საერთო სამაგისტრო გამოცდების ჩასაბარებლად 9 500-ზე მეტი აპლიკანტი დარეგისტრირდა. გამოცდების ეროვნული ცენტრის ინფორმაციით, საერთო სამაგისტრო გამოცდა 9-10 ივლისს ჩატარდება.
“2400-მდე მაგისტრობის მსურველმა A ტიპის ტესტი აირჩია, 1400-მდე აპლიკანტმა კი – B ტიპის. დაახლოებით ამდენივემ მონიშნა D ტიპის ტესტი. მაგისტრანტობის კანდიდატთა უმრავლესობა კი (3 500-მდე) გამოცდაზე E ტიპის ტესტს დაწერს. ყველაზე ცოტა, 800-მდე მონაწილე აბარებს ჩ ტიპის ტესტს. რუსულ ენაზე საერთო სამაგისტრო გამოცდის ჩაბარების სურვილი 120-მდე აპლიკანტმა გამოთქვა”, აცხადებენ ცენტრში.
გამოცდების ეროვნულ ცენტრში ასევე განმარტავენ, რომ 2013 წელს მაგისტრანტობის მსურველები ერთსა და იმავე საგამოცდო ტესტს აღარ ჩააბარებენ, მათთვის მიმართულებების მიხედვით სხვადასხვა ტიპის ტესტური დავალებები შემუშავდა.
საგამოცდო ტესტი ოთხი ნაწილისაგან შედგება: წაკითხულის გააზრება, ანალიტიკური წერა, ლოგიკური მსჯელობა და რაოდენობრივი მსჯელობა.
ოთხი დავალებიდან სამის წარმატებით დაძლევის შემთხვევაში, აპლიკანტს უფლება აქვს, სპეციალობის გამოცდა უშუალოდ უმაღლეს სასწავლებლებში ჩააბაროს და სწავლა მაგისტრატურაში გააგრძელოს.
06.06.13
