საქართველოს საგარეო საქმეთა მინისტრი თამარ ბერუჩაშვილი გერმანიაში ვიზიტის ფარგლებში, ბუნდესტაგის პრეზიდენტს ნორბერტ ლამერტს შეხვდა.
როგორც “თბილისი თაიმსს” საგარეო საქმეთა სამინისტროდან აცნობეს, გერმანიის ფედერაციულ რესპუბლიკაში საქართველოს საგარეო საქმეთა მინისტრის თამარ ბერუჩაშვილის ორდღიანი სამუშაო ვიზიტი 4 მაისს დაიწყო.
საგარეო უწყების ინფორმაციით, ვიზიტის მიზანია საქართველო-გერმანიის მჭიდრო პარტნიორული ურთიერთობების შემდგომი გაღრმავება და მთელ რიგ სფეროებში უკვე არსებული ნაყოფიერი თანამშრომლობის ახალი პრესპექტივების გამოვლენა.
ვიზიტის პირველი დღე გერმანიის ფედერაციული რესპუბლიკის უმაღლესი საკანონმდებლო ხელისუფლების წარმომადგენლებთან ოფიციალურ შეხვედრებს დაეთმო, კერძოდ, ბუნდესტაგის პრეზიდენტთან ნორბერტ ლამერტთან, ბუნდესტაგის საგარეო ურთიერთობათა კომიტეტის თავმჯდომარე ნორბერტ რიოტგენთან და ბუნდესტაგის სამხრეთ კავკასიის ქვეყნებთან მეგობრობის საპარლამენტო ჯგუფის წევრებთან: კარინ შტრენცთან, ფილიპ მისფელდერთან, ტობიას იოზეფ ცეხთან და მარტინ გერსტერთან.
საგარეო საქმეთა სამინისტროს ინფორმაციით, გერმანიის ბუნდესტაგის წარმომადგენლებთან შეხვედრებზე მხარეებმა საქართველო-გერმანიას შორის ორმხრივ და მრავალმხრივ ფორმატებში თანამშრომლობის საკითხთა ფართო სპექტრი განიხილეს და საპარლამენტთაშორისო თანამშრომლობა პოზიტიურად შეაფასეს, რომელიც სულ უფრო ინტენსიური ხდება. საგარეო საქმეთა მინისტრმა ბუნდესტაგის პრეზიდენტს ნორბერტ ლამერტს კიდევ ერთხელ გადაუხადა მადლობა 2015 წლის თებერვალში თბილისში სტუმრობისათვის, საქართველოსა და ევროკავშირს შორის ასოცირების შეთანხმების რატიფიცირებისთვისა და საქართველოსადმი გამოხატული მხარდაჭერისთვის.
თამარ ბერუჩაშვილმა გერმანელ პარლამენტარებთან საუბრებისას ასევე ხაზი გაუსვა საქართველოსთვის “აღმოსავლეთ პარტნიორობის” რიგის სამიტის განსაკუთრებულ მნიშვნელობას და ამ კონტექსტში საქართველოს მიერ ევროკავშირთან ინტეგრაციის პროცესში მიღწეულ პროგრესზე ყურადღება გაამახვილა. ამას გარდა, საუბარი შეეხო მიმდინარე რეფორმებს, საქართველოს ევროატლანტიკური მისწრაფებების რეალიზაციას, ოკუპირებულ ტერიტორიებზე შექმნილ ვითარებას და რეგიონულ უსაფრთხოებას.
ორმხრივი თანამშრომლობის კონტექსტში კიდევ ერთხელ გაესვა ხაზი საქართველოს ევროპული და ევროატლანტიკური ინტეგრაციის პროცესისადმი გერმანიის მხრიდან შემდგომი მხარდაჭერის მნიშვნელობას, ასევე, განიხილეს სავაჭრო-ეკონომიკური ურთიერთობების გაღრმავების პერსპექტივები.
4 მაისსვე, ვიზიტის ეკონომიკური ბლოკის ფარგლებში, საქართველოს საგარეო საქმეთა მინისტრმა გერმანული ბიზნესწრეების წარმომადგენლებთან შეხვედრა გამართა, რომელსაც ორგანიზება მსხვილმა ბიზნეს გაერთიანებამ – გერმანიის ეკონომიკის აღმოსავლეთ კომიტეტმა გაუწია. შეხვედრაზე გერმანელმა ბიზნესმენებმა კონკრეტული ინიციატივები წარმოადგინეს და ქვეყანაში არსებული ბიზნესკლიმატისა და საინვესტიციო შესაძლებლობების შესახებ ამომწურავი ინფორმაცია მიიღეს.
“აღსანიშნავია, რომ გერმანიის ეკონომიკის აღმოსავლეთ კომიტეტი მ/წლის 16-17 ივნისს, საქართველოში გამართავს ბიზნესფორუმს და მონაწილეობას მიიღებს საერთაშორისო კონფერენციაში “საქართველოს ევროპული გზა”, – ნათქვამია განცხადებაში.
ბერლინში ვიზიტის პირველ დღეს საგარეო საქმეთა მინისტრმა ინტერვიუები მისცა ცნობილ გერმანულ მედიასაშუალებებს, კერძოდ, საინფორმაციო სააგენტო “Reuters-ის ჟურნალისტს ანდრეას რინკეს, გაზეთ “Die Welt”-ის ჟურნალისტს სილკე მიულჰერსა და გაზეთ “Business and Diplomacy”-ის ჟურნალისტს რაინერ შუბერტს.
