მცხეთა – მთიანეთის ყოფილი გუბერნატორი, ბიზნესმენი ცეზარ ჩოჩელი გაზეთ „ალიასთან“ საუბარში აღიარებს , რომ მას ზურაბ ადეიშვილი და მიხეილ სააკაშვილი მილიონობით დოლარს „ახევდნენ“.
სქემა მარტივი და „ეფექტური“ იყო – სპეციალურად იჭერდნენ მის ნათესავებს, მეგობრებს, ახლობლებს და შემდეგ უფორმებდნენ საპროცესოებს, ხოლო ფულს ცეზარ ჩოჩელს ახდევინებდნენ. ბიზნესმენი „ალიას“ იმ ადამიანების სიას აწვდის ვის გამოც მიხეილ სააკაშვილმა სახელმწიფოს სახელით არაერთხელ გადაახდევინა ფული.
ნანა ოვაშვილი – 150 ათასი ლარი, თამაზ ცოფურიშვილი – 35 ათასი ლარი, მალხაზ ჯაბნიაშვილი – 35 ათასი ლარი, ვასილ ჩიგოგიძე – 1 მილიონი ლარი, ვასილ სულხანიშვილი – 1 მილიონი ლარი.
ცეზარ ჩოჩელის ნდობით აღჭურვილი პირი, ადამიანის უფლებათა დამცველი ნიკოლოზ მჟავანაძე „ალიასთან“ საუბარში აცხადებს, რომ „ცეზარ ჩოჩელმა ბიზნესი წამოიწყო არა სააკაშვილის პერიოდში, არამედ შევარდნაძის. სააკაშვილის პერიოდში ჩოჩელი არა სასათბურე პირობებში, არამედ გარკვეული ზეწოლის ქვეშ იყო. ჩოჩელის ნათესავებს, ახლობლებს რაღაც აბსურდული ბრალდებით აღუძრეს საქმეები და შემდეგ მილიონობით ლარი გადაახდევინეს მას. ცეზარ ჩოჩელისა და სააკაშვილის დაცვას შორის შეხლა-შემოხლაც მოხდა, ფიზიკურ ანგარიშსწორებასაც ჰქონდა ადგილი. რამდენიმე ბიზნესმენს სთხოვდნენ და დღესაც სთხოვენ, რომ ხელი დაადონ ჩოჩელს, ვითომ მასთან იყვნენ რაღაც ბინძურ საქმეებში გარიგებულები. მე მაქვს ინფორაცია, რომ მასზე გროვდებოდა კომპრომატები. ასეთი ბნელი საქმეების კეთება წარმოუდგენელია ზურაბ ადეიშვილის გარეშე. ამ საქმეში ჩართული იყო პროკურატურა. საპროცესო გარიგებების სია რაც ჩოჩელის ნებართვით მოგაწოდთ არასრულია, კიდევ უამრავი ჩახლართული საქმე არსებობს, რაშიც ასევე მილიონებია გადაყრილი. ასე რომ, ნურავის ნუ ჰგონია, რომ სააკაშვილი თავის გუბერნატორებს ან სხვა ბიზნესმენებს ინდობდა.“ – აცხადებს ნიკოლოზ მჟავანაძე გაზეთ „ალიასთან“ საუბარში.
07.06.13
ნათია ქომოშვილი
