ხვალ 12:00 სთ-ზე, საქართველოს საპატრიარქოს ბიბლიოთეკაში, გაიმართება ახალგაზრდული მოძრაობა დავითიანნისა და განათლებისა და მეცნიერების სამინისტროს ერთობლივი პროექტის “წიგნის მეგობრების” პრეზენტაცია.
როგორც დავითიანიდან „თბილისი თაიმს“ აცნობეს, სრულიად საქართველოს კათოლიკოს-პატრიარქი ილია II შეხვდება პროექტის მონაწილეებს და დალოცავს მათ.
უწმინდესისა და უნეტარესის ლოცვა-კურთხევით, შაბათი დღე, წიგნის კითხვის დღედ გამოცხადდა. უწმინდესმა აღნიშნული ინიციატივა 2 ივნისს, სამების საკათედრო ტაძარში, საკვირაო ქადაგებისას გააჟღერა.
პატრიარქმა ამ დღეს ყველას, განსაკუთრებით კი ახალგაზრდებს, წიგნების კითხვისკენ მოუწოდა.
პროექტის პრეზენტაციის შემდეგ, უწმინდესი ახალგაზრდებთან ისაუბრებს წიგნის კითხვის მნიშვნელობაზე. ამის შემდეგ, გაიმართება საქართველოს სახალხო არტისტის, გოგი ხარაბაძის აუდიო პროექტის პრეზენტაცია – “მეზღაპრე ხომალდი”, რომელიც შედგება 8 დისკისგან. სადაც ჩაწერილია გოგებაშვილის ’’იავნანამ რა ჰქმნა’’, პეროს, ანდერსენის, გრიმების, პუშკინისა და უაილდის ზღაპრები. ასევე პოპულარული და საყვარელი ზღაპრები – ქართული და მსოფლიო ხალხთა საგანძურიდან.
ამავე დროს მოეწყობა ბავშვების ნახატების გამოფენა, რომელიც შექმნილია აუდიო-ლიტერატურის თემატიკაზე.
პრეზენტაციის შემდეგ, ღონისძიება გაგრძელდება საპატრიარქოს ბიბლიოთეკაში, სადაც დავითიანნთან არსებული ლიტერატურული კლუბი “დალკი”, მოაწყობს წიგნის საჯარო კითხვას.
ღონისძიებას პატრიარქისა და პროექტი “წიგნის მეგობრების” კონკურსანტების გარდა, დაესწრებიან მთავრობის წარმომადგენლები და საზოგადო მოღვაწეები.
07.06.13
