ევროპის რეკონსტრუქციისა და განვითარების ბანკის (EBRD) მმართველთა საბჭოს წევრთა სახელით, თიბისი ბანკმა საქართველოს სოლიდარობის ფონდში 20 000 ლარს გადარიცხა. აღნიშნული თანხა სოლიდარობის ფონდის ბენეფიციარებს, ონკოლოგიური დაავადებების მქონე პაციენტების დიაგნოსტიკასა და მკურნალობის დაფინანსებას მოხმარდება. თანხა სოლიდარობის ფონდში სწორედ EBRD-ის წევრთა სახელზე გადაირიცხა.
„მიგვაჩნია, რომ ეს არის ძალიან მნიშვნელოვანი მხარდაჭერა, როგორც ონკოლოგიური პაციენტების მკურნალობის დაფინანსების მხრივ, ასევე სოლიდარობის ფონდის საქმიანობის გაფართოების მიმართულებით. ფონდში კერძო სექტორის კიდევ უფრო მეტი ჩართულობა საშუალებას მოგვცემს, გავაფართოოთ ჩვენი პროგრამები და ხელმისაწვდომი გავხადოთ ისეთი ძვირადღირებული მედიკამენტები, როგორებიცაა მაბტერა და ჰერცეპტინი,“ – განაცხადა საქართველოს მთავრობის ადმინისტრაციის უფროსის მოადგილემ ნინო კობახიძემ.
2015 წლის 13 მაისის მონაცემებით საქართველოს სოლიდარობის ფონდში
ონკოლოგიური დაავადების მქონე 97 ბავშვისა და 22 წლამდე ახალგაზრდის დიაგნოსტიკისა და მკურნალობისათვის 357 000 ლარის, 934 800 აშშ დოლარისა და 172 800 ევროს დაფინანსება დაამტკიცა.
ფონდის მხარდაჭერით 57 პაციენტის დიაგნოსტიკა და მკურნალობა საქართველოში დაფინანსდა, ხოლო 40პაციენტი საქართველოში მიმდინარე მკურნალობის პარალელურად უკვე გაემგზავრა ან გეგმავს საზღვარგარეთ გამგზავრებას კონკრეტული დიაგნოსტიკისა და სამკურნალო ჩარევისათვის, მათ შორის განსაკუთრებით ძვირადღირებული ძვლის ტვინის ტრანსპლანტაციის ჩასატარებლად. სოლიდარობის ფონდის ამოქმედებიდან დღემდე სულ ჩარიცხულია 2 600 000 ლარზე მეტი.
საქართველოს სოლიდარობის ფონდი პრემიერ-მინისტრის ირაკლი ღარიბაშვილის ინიციატივით 2014 წლის ივნისში შეიქმნა.
ფონდის მიზანია საზოგადოების, კერძო სექტორისა და სახელმწიფოს თანამონაწილეობით, ქვეყანაში ფართოდ და სისტემურად დაინერგოს „მიკრო-ფილანტროფია“ ანუ მცირე ქველმოქმედება და თავად საზოგადოების მიერ შექმნილი ალტერნატიული, არასაბიუჯეტო რესურსით, შესაძლებელი გავხადოთ მძიმე სენით დაავადებული ან შეზღუდული შესაძლებლობების მქონე ბავშვებისა და მათი ოჯახების დახმარება.
