პარლამენტის თავმჯდომარის განცხადებით, ევროპასთან ინტეგრაციის კომიტეტს ლევან ბერძენიშვილი, აგრარულ საკითხთა კომიტეტს კი გელა სამხარაული უხელმძღვანელებს. როგორც ბიუროს დღევანდელ სხდომაზე პარლამენტის თავმჯდომარემ დავით უსუფაშვილმა განმარტა, გადაწყვეტილება მას ერთპიროვნულად არ მიუღია.
“პარლამენტის რეგლამენტის მიხედვით, კომიტეტების თავმჯდომარეობის კანდიდატურების დასახელება არის ფრაქციების, საპარლამენტო ჯგუფების უფლება, თუმცა თუ შესაბამისი ვადის ამოწურვამდე ეს უფლება არ იქნა რეალიზებული, შემდგომ უკვე პარლამენტის თავმჯდომარეს ენიჭება აღნიშნული უფლებამოსილება. მე ვსარგებლობ ამ უფლებით, მაგრამ არა ერთპიროვნულად. მქონდა კონსულტაციები საპარლამენტო უმრავლესობაში გაერთიანებულ ფრაქციებთან. მათთან მოლაპარაკებების შედეგად შემოვდივარ წინადადებით, რომ აგრარულ საკითხთა კომიტეტის თავმჯდომარის ვაკანტურ თანამდებობაზე წარდგენილ იქნას გელა სამხარაულის კანდიდატურა, ხოლო ევროპასთან ინტეგრაციის კომიტეტის თავმჯდომარის ვაკანტურ თანამდებობაზე ლევან ბერძენიშვილის კანდიდატურა”, – განაცხადა უსუფაშვილმა.
შეგახსენებთ, რომ აგრარულ საკითხთა და ევროპასთან ინტეგრაციის კომიტეტების თავმჯდომარეების თანამდებობები, მას შემდეგ გახდა ვაკანტური, რაც ყოფილმა ხელმძღვანელებმა გიგლა აგულაშვილმა და თინა ხიდაშელმა მინისტრთა კაბინეტში გადაინაცვლეს და ამის გამო მათ დეპუტატის უფლებამოსილება შეუწყდათ.
