სწრაფი ჩარიცხვის აპარატები, რომლებიც უკვე რამდენიმე წელია საქართველოს ბაზარზე აქტიურად გამოჩნდა კვლავ აქტუალურია, შეიძლება ითქვას, რომ ის გარკვეული კუთხით მომხმარებელს ცხოვრებას უადვილებს და რაც მთავარია ზოგავს დროს.
ზოგადად ნაღდი ფულის მიმღები გადახდის აპარატების ქსელი საქართველოს საგადასახადო ბაზარზე ძალიან სწრაფი ტემპით განვითარდა. ის მრავალი სერვისით გამოირჩევა, მისი ფუნქციაა მოხერხებული და ოპერატიული გზით სხვადასხვა ტიპის გადასახადების, თანხის გადარიცხვებისა და და სამომხმარებლო ბალანსის შევსების განხორციელება.
თითოეული ჩვენგანი ალბათ ძალიან ხშირად სარგებლობს სწორედ ამ სწრაფი ჩარიცხვის აპარატათ, რადგან აქტიურად ვიხდით, როგორც კომუნალურ, ისე ტელეკომინიკაციის გადასახადებს, ის ასევე პოპულარულია აზარტული თამაშების მოყვარულ ხალხში, რადგან მისი მეშვეობით ხდება თამაშების ბალანსის შევსება.
მიუხედავად იმისა, რომ ის თითქოს მომხმარებლის კომფორტზეა ორიენტირებული, სწორედ ამ მომხმარებლს თანდათან აღნიშნული კომფორტის მაგივრად უამრავ პრობლემას უქმნის.
მოსახლეობა მრავალი კომპანიის მიერ შემოთავაზებული სწრაფი ჩარიცხვის აპარატებიდან უპირატესობას მაინც საქართველოს ბანკის „ექსპრეს ფეის“ ანიჭებს, რადგან 2013 წლის 1 აპრილიდან სწრაფი გადახდის აპარატებით მობილური ტელეფონის ბალანსის შევსების საკომისიოს ოდენობა ჩარიცხული თანხის 4 % -ით განისაზღვრა, ხოლო „ექსპრეს ფეის“ სარგებლობის შემთხვევაში საკომისიო 0 % -ია. მიუხედავად ამ უპირატესობისა ხშირად მომხმარებლები აღნიშნავენ, რომ „ექსპრეს ფეის“ აპარატით სარგებელობა ორმაგი თანხის გადახდით სრულდება.
ალბათ არავის გაგიკვირდებათ, თუ ვიტყვი, რომ სწორედ საქართველოს ბანკის აპარატები გამოირჩევა გაუმართაობით. არსებობს მრავალი ფაქტი, როდესაც მომხმარებელს კომუნალური გადასახადები სწორედ მისი საშუალებით გადაუხდია, რელურად კი თანხა არ დარიცხულა და უარესი მომხდარა, მათ ჯარიმაც კი დაეკისრათ.
აღსანიშნავია, რომ აპარატი მწყობრიდან განსაკუთრებით უამინდობის დროს არის გამოსული. უბრალოდ არ მუშაობს, ან თუ მუშობს თანხას „ყლაპავს“. რას ვაკეთებთ ამ დროს? რა თქმა უნდა ცხელ ხაზზე ვრეკავთ და ვცდილობთ „ჩაყლაპული“ თანხის დაბრუნებას, მაგრამ უშედეგოდ. მათი მხრიდან რეაგირებას დიდი დრო სჭირდება, თუმცა, თუ გაგვიმართლა და ცხელა ხაზზე დარეკვას შესაბამისი ქმედება მოჰყვა, იმ წუთას ახალი პრობლემა იჩენს თავს. ჩეკი, რომელიც ჩვენი ჩარიცხული თანხის მტკიცებულებაა და აუცილებელია მისი წარდგენა, არ გვაქვს. გასაოცარია, რადგან ჩნდება კითხვა. როგორ წარვადგინოთ ჩეკი, როდესაც აპარატი მას უბრალოდ არ იძლევა. ბუნებრივი ამ დროს, არც ცხელ ხაზზე დარეკვას აქვს რაიმე აზრი.
როგორც ფორუმზე და სოციალურ ქსელში, ისე ცხოვრებაში ხშირად შევხვდებით ადამიანებს, რომლებიც აღნიშნულ პრობლემაზე ბევრს საუბრობენ და წერენ. ასევე არსებობს მოსაზრება, რომ აპარატებს ფინანსური სარგებლის მიზნით, მომხმარებელი თვითონ აზიანებს.
„გუშინ საღამოს 9 საათზე აჭარაბეთზე საქართველოს ბანკის აპარატიდან 1 ლარი ჩავრიცხე და ჯერ კიდევ არ არის დეპოზიტზე ასახული. ქვითარიც არ მოუცია აპარატს, შესაბამისად ცხელ ხაზზეც ვერ ვრეკავ“ – გვითხრა გიორგი ბეროშვილმა
„მობილურზე 5 ლარი უნდა ჩამერიცხა, თუმცა ხურდა, რომ ჩავაგდე ტერმინალი გაიჭედა და დავრჩი ანგარიშისა და ფულის გარეშე “ – ნანა გულიაშვილი
თინათინ ბაღდავაძე: „როდესაც ერთ-ერთი კომუნალურის გადასახადს ვიხდიდი და ეს თანხა ჩემთვის ძალიან მნიშვნელოვანი იყო, რადგან კაპიკ-კაპიკ მქონდა მოგროვებული, აპარატმა სწორედ ამ დროს „გაჭედა“ და თანხა დამეკარგა. ცხელ ხაზზე დარეკვისას კი დამპირდნენ, რომ პრობლემა მოგვარდებოდა თუ ჩეკს წარვადგენდი, ჩეკს, რომელიც აპარატმა არ მომცა. ეს არ არის პირველი შემთხვევა და ვფიქრობ,რომ ამის შემდეგ სხვა სწრაფი ჩარიცხვის აპარატებით ვისარგებლებ, მიუხედავად იმისა, რომ ისინი საკომისიოს აჭრის, ორმაგის გადახდა მაინც არ მომიწევს.“
„შეფერხება ნებისმიერ აპარატს შეიძლება ჰქონდეს, თუმცა: ექსპრეს ფეის სისტემატურად აქვს პრობლემა, ისინი მონოპოლისტები არიან და ხელის განძრევა და პრობლემის მოგვარებაც კი არ უნდათ, ან ეზარებათ“ – ამბობს მოქალაქე, რომელმაც ვინაობის გამხელა არ ისურვა.
„ჯიქიას ქუჩის კუთხეში დგას „ექსპრეს ფეის“ გადახდის აპარატი და შემთხვევით დავინახე, როგორ ცდილობდა ახალგაზრდა ბიჭი აპარატის „გაჭედვას“, სამწუხაროდ ვერ მოვასწარი რეაგირება, რადგან, მან როგორც, კი დამინახა, მაშინვე გაიქცა.“ – გვითხრა საქართველოს ბანკის სწრაფი ჩარიცხვის აპარატით მოსარგებლე მოქალაქემ, რომელიც მხოლოდ მოსახლეობას ადანაშაულებს აპარატის გაუმართაობაში, მან ვინაობის გამხელა არ ისურვა.
ზოგადად საინტერესოა, რამდენად ხშირად ხდება სწრაფი ჩარიცხვის აპარატების ქსელის გამართულობის კონტროლი, მისი მდგომარეობის შესწავლი, რეპორტინგი და საერთოდ ხდება თუ არა ქსელში არსებული პრობლემების იდენტიფიცირება და გამოსწორება. ჩვენ ამ საკითხთან დაკავშირებით საქართველოს ბანკს მივმართეთ და ვთხოვეთ გარკვევა, თუმცა მათ საკმაოდ მოკლედ გვიპასუხეს, აღნიშნული პრობლემა უარყვეს და რაც არ უნდა გასაკვირი და დაუჯერებელი იყოს, განაცხადეს, რომ სწრაფი ჩარიცხვის აპარატების მონიტორინგი ყოველდღე ხორციელდება.
„ბოლო თვეების განმავლობაში, რაიმე ქსელურ შეფერხებას ადგილი არ ქონია. თუ კი კონკრეტულად, ინდივიდუალურ შემთხვევაში მომხმარებელს, ექმნება რაიმე ტექნიკური შეფერხება, ამისთვის მუშაობს, სატელეფონო ცენტრი, სადაც მომხმარებელს საშუალება აქვს დარეკოს და დააფიქსიროს კონკრეტული შემთხვევა. ზარებზე, რომელიც ფიქსირდება სატელეფონო ცენტრში, მხარდაჭერის ჯგუფი მყისიერად რეაგირებს, რადგან, სისტემატურად 24 საათი კვირაში შვიდი დღე, მიმდინარეობს თვითმომსახურების აპარატების მონიტორინგი, ტექნიკური ჯგუფების მიერ. უამინდობა აპარატების მუშაობაზე გავლენას არ ახდენს. რაც შეეხება ვანდალიზმის ფაქტებს და ტერმინალის გაზრახ დაზიანებას, ასეთის არსებობის შემთხვევავში საქმე გადაეცემა სამართალდამცავ ორგანოებს“- კომპანია “ექსპრეს ფეი“.
მოკლედ, როგორც უკვე აღვნიშნე საქართველოს ბანკის „ექსპრეს ფეის“ ნულოვანი საკომისიო აქვს, თუმცა მაინც უნდა დავფიქრდეთ, გვიღირს კი რისკზე წასვლა, ხშირად ორმაგის გადახდა და უბრალოდ აპარატისთვის ფულის ჩუქება?
მასალა მოამზადა
ლაკო ბიტ-ბაბიკოვმა
