თავდაცვის მინისტრის თინათინ ხიდაშელის განცხადებით, საქართველოს ყოფილმა პრეზიდენტმა მიხეილ სააკაშვილმა უკრაინის მოქალაქეობის მიღებით კიდევ ერთი მოღალატეობრივი აქტი ჩაიდინა.
ხიდაშელმა ამის შესახებ ჟურნალისტებს ქუთაისში, თემის კომენტირებისას განუცხადა.
ხიდაშელის თქმით, სააკაშვილს არაფრად უღირს ის, რაც ძვირფასია ქვეყნის მოქალაქეებისათვის.
„საქართველოს ყოფილმა პრეზიდენტმა გუშინ კიდევ ერთი მორიგი მოღალატეობრივი აქტი ჩაიდინა. ყველაზე საუკეთესოდ მისი ერთგულება საკუთარი სამშობლოს მიმართ, მისი გუშინდელი ქმედებით გახდა ნათელი. თუკი ვინმეს რამეში, თეორიულად მაინც, ეჭვი ეპარებოდა, მგონი ყველამ ძალიან კარგად დაინახა, როგორი ერთგულია საკუთარი სამშობლოს მიმართ მისი ყოფილი პრეზიდენტი, რომელსაც არაფრად უღირს, ის რაც ყველაზე ძვირფასია თითოეული ჩვენთაგანისთვის – ჩვენი ქვეყნის მოქალაქეობა და ჩვენი ქვეყნის სამსახური“, – განაცხადა ხიდაშელმა.
მიხეილ სააკაშვილს უკრაინის მოქალაქეობა გუშინ მიენიჭა. ამასთან, ის ოდესის ოლქის გუბერნატორად დაინიშნა.
