დღეს, საქართველოს იუსტიციის მინისტრმა თეა წულუკიანმა საქართველოში ინდოეთის რესპუბლიკის საგანგებო და სრულუფლებიანი ელჩი (რეზიდენციით ქ. ერევანში) სურემ ბაბუ მიიღო. დიალოგის თემას წარმოადგენდა ორი ქვეყნის იუსტიციის სამინისტროების ურთიერთთანამშრომლობის საკითხები. საუბარი შეეხო სავიზო რეგულაციების თემებსაც.
იუსტიციის მინისტრ თეა წულუკიანის განცხადებით, საქართველოსა და ინდოეთის იუსტიციის სამინისტროებს შორის თანამშრომლობა გაღრმავდება. შესაბამის დოკუმენტზე ინტენსიური მუშაობა მიმდინარეობს და პროცესი სულ მალე დასრულდება.
„ჩვენ ვასრულებთ ტექსტზე შეჯერების ეტაპს, რომელიც ეხება იუსტიციისა და სამართლებრივ სფეროში როგორც სამოქალაქო, ისე სისხლის სამართლის საქმეებზე საქართველოსა და ინდოეთს შორის თანამშრომლობას“, − აღნიშნა საქართველოს იუსტიციის მინისტრმა.
როგორც შეხვედრაზე ინდოეთის ელჩმა განაცხადა, ახალი რეგულაციების ამოქმედების შემდეგ ინდოეთის მოქალაქეებს საქართველოში განათლების მიღების, საქმიანი თუ ტურისტული ვიზიტების განხორციელებისა და ბინადრობის მიღების პრობლემები არ შეჰქმნიათ და ამ მხრივ სტატისტიკა დამაიმედებელია. მისი თქმით, ინდოეთის მოქალაქეებს ესმით საქართველოს საემიგრაციო პოლიტიკა, პატივს სცემენ საქართველოს კანონებს და ორ ქვეყანას შორის ეკონომიკური თანამშრომლობა გაგრძელდება.
„როგორც ბატონმა ელჩმა ბრძანა, სტატისტიკა არის იმედისმომცემი. ჩვენი ახალი გაწონასწორებული და ევროპული სტანდარტების შესაბამისი მიგრაციის პოლიტიკის ფარგლებში 1500-ზე მეტი სტუდენტი, ინვესტორი უპრობლემოდ იღებს ბინადრობის მოწმობას, არის სულ თითზე ჩამოსათვლელი რამდენიმე ათეული უარის შემთხვევა“, − განაცხადა თეა წულუკიანმა.
