დღეს სოფლის მეურნეობის მინისტრმა შალვა ფიფიამ და ჩინეთის ელჩმა საქართველოში ჩენ გიან ფუმ ოფიციალურად ხელი მოაწერეს დოკუმენტს, რომლის თანახმადაც საქართველოს სოფლის მეურნეობის სამინისტრომ ჩინეთის რესპუბლიკის მთავრობისგან გრანტის სახით, საჩუქრად 30 ერთეული თანამედროვე ტექნიკა მიიღო.
,,მელიორაცია არის ერთ-ერთი მნიშვნელოვანი მიმართულება სოფლილს მეურნეობაში. დღეს, აქტიურად მიმდინარეობს მაგისტრალური არხების წმენდა და რეაბილიტაცია. საუბარია იმ არხებზე, რომელთა რეაბილიტაცია 30 წლის განმავლობაში არ განხორციელებულა. ეს ტექნიკა მნიშვნელოვან წვლილს შეიტანს ამ სამუშაოების ეფექტურ განხორციელებაში. ჩვენ გვაქვს ამბიციური მიზანი, რომ წლის ბოლომდე სამჯერ მეტი ფართობის გასარწყავიანება განხორციელდება “ _ განაცხადა შალვა ფიფიამ.
ხელმოწერის ცერემონიალს საპატიო სტუმრის სტატუსით ესწრებოდნენ ფინანსთა მინისტრი ნოდარ ხადური და გაერთიანებული სამელიორაციო სისტემების კომპანიის დირექტორი ვაჟა კირტავა.
აღსანიშნავია, რომ ჩინური კომპანიების „ლოვოლის“, „ჯონიანგის“, „შენგუნგის“ და „ფოტონ ჯგუფის“ მიერ წარმოებული ტექნიკა გამოიყენება სამშენებლო და სამელიორაციო ინფრასტრუქტურის სარეაბილიტაციო და საექსპლუატაციო სამუშაოებისთვის და საკმაოდ დიდი პოპულარობით სარგებლობს მსოფლიოს სხვადასხვა ქვეყნებში.
გრანტით მიღებულ ტექნიკას, (ექსკავატორი – 12 ერთეული, ექსკავატორ-დამტვირთავი – 8 ერთეული, მუხლუხოებიანი ექსკავატორი – 4 ერთეული, ბულდოზერი – 4 ერთეული, ტექნიკის გადასაადგილებლად ლაფეტი, გამწევი პლატფორმით, 30 ტონიანი ტვირთამწეობის 2 ერთეული) სოფლის მეურნეობის სამინისტრო სამელიორაციო სისტმების კომპანიას გადასცემს.
აღნიშნული ტექნიკა მნიშვნელოვნად შეუწყობს ხელს საქართველოში საირიგაციო სისტემების სრულყოფის კუთხით მიმდინარე სამუშაოების შესრულებას, რაც საბოლოოდ, ქართველ ფერმერებს დამატებით სარგებელს მოუტანს.
2013 წელს გაერთიანებული სამელიორაციო სისტემების კომპანიის მიერ სარემონტო სამუშაოები დაიწყო 98 ობიექტზე, აქედან 65 ობიექტზე უკვე დასრულებულია.
დღეისათვის უკვე გაწმენდილი და შეკეთებულია სარწყავი სისტემების 675 კმ მაგისტრალური არხი და პირველი რიგის გამანაწილებელი, 3 ათას კილომეტრამდე სხვადასხვა დონის გამანაწილებლები, 115 კილომეტრამდე დამშრობი სისტემების არხები.
რაც საშუალებას გვაძლევს დამატებით წყალუზრუნველვყოთ 23 800 ჰექტარი სასოფლო სამეურნეო სავარგული.
11.06.13
